Ўзбекистондаги экспортчи компаниялар гилоснинг экспорт нархи бўйича якдил хулосага келди. Бу ҳақда, «Ўзбекозиковқатхолдинг» матбуот хизматига таяниб, Sputnik маълум қилди.
«Биргаликда олиб борилган синчков изланишлар натижасида барча томон бир фикрга келди: бу йил Ўзбекистондан экспорт қилинадиган гилоснинг энг кам нархи килограммига 4 доллар бўлиши керак. Ушбу нарх бизга яқин жойлашган бозорлар учун амал қилади ва МДҲ бозорларида олдинги йилларда пайдо бўлган сотув тизимини сақлаб қолиш имконини беради», — дейилган хабарда.
Экспертлар фикрига кўра, ушбу нарх ўзбек гилоси нархини дунё бозори нархларига яқинлаштиради. Ўзбекистонда етиштирилган меваларнинг сифати ва экологик тозалиги хорижий харидорларда шубҳа уйғотмайди.
Маълумот учун, бугунги кунда Ўзбекистон гилос экспорти бўйича дунёда бешинчи ўринни эгаллаб турибди. Экспорт ҳажми йилига 100 минг тоннани ташкил этади.
Изоҳ (0)