Ўзбекистон Президенти Шавкат Мирзиёевнинг 2018 йил 12 май куни Тошкент шаҳрида амалга оширилаётган бунёдкорлик ишлари билан танишиш давомида берган топшириқларида белгиланган вазифаларнинг бажарилишини таъминлаш мақсадида пойтахтда «Муаммолар ечими — ҳаракатлар якдиллигида» гуруҳларини ташкил этиш ва унинг фаолиятини йўлга қўйиш тўғрисида кенг қамровли қўшма қарор қабул қилинди. Бу ҳақда Тошкент шаҳар ҳокимлиги ахборот хизмати хабар бермоқда.
Тошкент шаҳар ҳокимлиги, прокуратураси, ички ишлар бош бошқармаси, давлат солиқ бошқармаси, фавқулодда вазиятлар бошқармаси, Миллий гвардия ва бошқа давлат идораларининг малакали мутахассислари ҳамда жамоат ташкилотларининг 270 нафардан ортиқ вакилларидан иборат бўлган мазкур гуруҳлар бевосита маҳаллаларда уйма-уй юриб, оилаларнинг энг муҳим муаммоларини ҳал этишда уларга ҳар томонлама кўмаклашиш, ҳудудларда тадбиркорликни ривожлантириш, аҳоли, айниқса ёшлар бандлигини таъминлаш, соғлиғини сақлаш, ижтимоий муҳофаза қилишга йўналтирилган чораларни жадал амалга оширишни таъминлайди.
Тошкент шаҳар ҳокимлигидан 16 та гуруҳлар бевосита хонадонларда оилаларни ўрганиш, уй-жой коммунал ва йўл хўжалиги, энергия, сув таъминоти, ҳудудларни ободонлаштириш, ижтимоий турмуш тарзидаги мавжуд муаммоларни аниқлаш ҳамда ҳал этиш бўйича аниқ мақсадли тадбирларни амалга ошириш мақсадида пойтахтнинг Сергели, Учтепа, Шайхонтоҳур ва Олмазор туманларида бўлди.
Ўзаро мулоқот чоғида аҳоли томонидан кўтарилган муаммоларни тез ва қисқа муддатларда ҳал этиш чоралари кўрилди. Ўз ўрнида шуни таъкидлаш жоизки, бу гуруҳлар барча туманларда маҳаллаларга бориб, ижтимоий ҳимояга муҳтож барча оилаларнинг турмуш-тарзи билан яқиндан танишиб, мавжуд муаммоларни ўрганиш ва унинг ечимини топишга киришди.
Жумладан, тезкор усулда ишлашни ўз олдига асосий мақсад қилиб қўйган ушбу гуруҳлар томонидан қисқа мудатда маҳаллаларга ташриф буюрилиб, Олмазор туманида 593 та, Шайхонтоҳур туманида 578 хонадонларнинг турмуш тарзи ўрганилди. Шунингдек, 104 та ижтимоий ҳимояга муҳтож оила аъзолари билан яқиндан мулоқот қилинди.
Изоҳ (0)