Марказий банк бошқаруви 28 апрелдаги йиғилишда қайта молиялаш ставкасини, иқтисодиётдаги мавжуд ва кутилаётган ўзгаришлардан келиб чиқиб, йиллик 14 фоиз миқдорида ўзгаришсиз қолдиришга қарор қилди. Бу ҳақда регуляторнинг расмий сайтида маълум қилинди.
Истеъмол нархлари ўсиш суръатларининг секинлашишига қарамасдан, инфляция даражасини 2018 йил учун прогноз кўрсаткичлари доирасида бўлишини таъминлаш бўйича хатарлар сақланиб қолмоқда.
Истеъмол баҳолари индекси (ИБИ) усули бўйича ҳисобланган инфляция даражаси 2018 йилнинг январь ойидаги 2,7 фоизлик кўрсаткичдан сўнг февраль ва март ойларида 1,1 фоизгача пасайиб, прогноз кўрсаткичлари доирасида бўлди.
Пул бозоридаги фоиз ставкалари қайта молиялаш ставкасига яқин даражада тебраниб турди. Бу, ўз навбатида, банкларнинг депозит ва кредитлар бўйича реал фоиз ставкаларини ижобий даражада шаклланишига хизмат қилди.
2018 йил I чорагида пул массаси йил бошидан 1,2 фоизга ошиб, прогноз кўрсаткичларидан паст бўлди.
Изоҳ (0)