Фарғоналик 80 ёшли Зебинисо Аҳмедова Ҳаж зиёрати учун жамғарган 48 миллион сўм маблағи ҳисобига қишлоққа тоза ичимлик суви олиб келди. Бу ҳақда «Дарё» мухбири Азизжон Эрматов хабар берди.
Фарғона вилояти, Учкўприк тумани Янгиобод маҳалласида истиқомат қилувчи 80 ёшли Зебинисо Аҳмедова Ҳаж зиёрати учун жамғарган 48 миллион сўм маблағини қишлоққа тоза ичимлик суви олиб келишга сарфлади. Зебинисо Аҳмедованинг ташаббуси ва саховати билан 300 метрлик қудуқ қазилиб, сув чиқарилди. Натижада маҳалладаги 150 дан ортиқ хонадон, 260 ўринли умумтаълим мактаби, мактабгача таълим муассасаси ҳамда қишлоқ оилавий поликлиникаси тоза ичимлик сувидан баҳраманд бўлди.
«Янгиободдаги ҳар бир оила, хонадон мен учун бегона эмас. Маҳалламиз аҳолиси неча йиллардан буён тоза ичимлик суви муаммоси билан яшарди. Яхши ният билан муборак Ҳаж сафари учун жамғариб қўйган пулларим ҳисобидан шу хайрли ишни амалга оширдик. Шукр, мана шу меҳнатларим ортидан иззат-ҳурмат топдим. Маҳалладошларим, фарзанд ва набираларим қувончини кўриб, умримга умр қўшилди», – дейди Зебинисо Аҳмедова.
Зебинисо Аҳмедова турмуш ўртоғи Қодиржон Тўхлибоев билан 11 нафар фарзандни эл корига ярайдиган инсон қилиб тарбиялади. Олти қизи шифокор, икки қизи ўқитувчи, ўғли Иқболжон тадбиркор сифатида элга беминнат хизмат қилиб келмоқда.
Изоҳ (0)