Покистоннинг Синд вилояти Ларкан шаҳридаги тўйда рақсга тушишдан бош тортгани учун отиб ташланган қўшиқчи Самина Самуннинг қотиллари полиция билан тили бир бўлиб чиқди, деб ёзади «Ҳордиқ» газетаси. Натижада улар жазосиз қолди.
Ўша куни полициячилар воқеа жойига етиб келган. Лекин қотилларни безовта қилмаган. Аксинча, ҳофиза билан тўйда хизмат қилган машшоқларни қамаб қўйган ва тўйда ишлаб топган пулларини тортиб олган.
Бундан норози бўлган ларканликлар эса кўплашиб полиция маҳкамаси биноси ёнига келди-ю, ўтирган ҳолда норозилик акцияси ўтказа бошлади. Уларнинг талаби битта. Қотилларни қамоққа олиш ва қилмишига яраша жазо тайинлашдан иборат эди. Орадан ҳеч қанча ўтмай, аҳоли вакиллари интернетдаги ижтимоий сайтларда шу ҳақдаги ҳақиқатни чоп эта бошлади. Улар сафига ёзувчи Ойша Сарварий қўшилди. У ҳам Ларканда аёлларни ахлат ўрнида ҳам кўрмасликлари, аёл қанчалар разолат ботқоғига ботиб кетганини ўз битикларида кўрсатиб берди. Шунинг натижасида марҳуманинг тарафдорлари кўпайгандан кўпайди.
— Мен полициячиларнинг икки қотилга қандай муносабат юритганини ўз кўзларим билан кўрдим, — дейди марҳум ҳофизанинг эри Ошиқ Али. — Гўё улар жиноятчи, қотил эмас, аксинча бообрў одамлар каби ҳурмат-иззатда бўлди.
Ёзувчи Ойша Сарварийнинг фикрича, ҳукумат раҳбарлари бундай жиноятларни шафқатсизларча жазолашга ўтиши лозим. Акс ҳолда охири вой бўлади.
Эслатиб ўтамиз, 24 ёшли ҳомиладор Самун тўйда қўшиқ куйлаётган эди. Гувоҳлар сўзларига кўра, бир эркак қизга тўппонча ўқталиб, ўтириб куйлаш ўрнига, ўрнидан туриб, рақсга тушишни буюрган. Самун ўрнидан турган, аммо рақсга тушишдан бош тортган, шунда эркак уни отиб ташлаган.
Изоҳ (0)