Тожикистоннинг Asia-Plus ахборот агентлиги мухбири Ўзбекистоннинг олтита вилоятини кезиб, мамлакатнинг бугунги кўриниши борасидаги ўз таассуротлари билан бўлишди.
Агентлик мухбири Тошкентга самолёт орқали эмас, балки энг узоқ йўл — Сўғд вилоятидаги чегара орқали келишни истаган. У Ўзбекистоннинг Тожикистон билан Сурхондарёдаги чегарасини кесиб ўтиб, Тошкент шаҳрига қадар йўл-йўлакай Сурхондарё, Қашқадарё, Самарқанд, Жиззах, Сирдарё ва Тошкент вилоятларини сайр қилиб келган.
Виза режими бекор қилингач, ўзбек-тожик чегарасини ҳар куни 10 мингга яқин одам кесиб ўтмоқда. Эндиликда божхона ўтказиш пунктларида одамлар гавжум. Майда бизнесменлар талаб юқори бўлган товарларни бир ёқдан иккинчисига ташиб, даромад кўрмоқда. Масалан, Ўзбекистондан Тожикистонга тухум, гуруч, ўсимлик ёғи ва текстил маҳсулотлари олиб кетилаётган бўлса, Тожикистондан олма, нок, Хитой маҳсулотлари, чангютгич ва гиламлар ташилмоқда. Икки мамлакатнинг амалдаги қонунларига кўра, одамлар чегарадан қиймати 300 долларгача бўлган товарларни ҳеч қандай бож тўловларисиз олиб ўтишлари мумкин.
Бундан ташқари мухбир ўзбек таксичиларининг хизмати тожикларникидан кўра арзонроқ эканлигини ҳам таъкидлаб ўтган.
«Тожикистонда лицензиясиз таксичилик қиладиганлар 50 километр масофа учун 25 сомоний (25 минг сўм) сўраса, ўзбеклар худди шунча масофага узоғи билан 10 сомоний сўрайди», — деб ёзади у.
Шунингдек, мухбир ўзбек ошхоналари ҳақида ҳам ўз таассуротлари билан бўлишди:
Ўзбекистон чегарасини кесиб ўтиб, то Тошкентга етиб боргунимизга қадар йўлда минглаб кафе ва ресторанларга дуч келдик. Тошкентгача бўлган салкам минг километрлик йўлда офицантлари махсус кийимсиз хизмат қиладиган бирорта муассасага дуч келмадим; бирортасида синиқ мебел ёки ювилмаган идишни учратмадим. Нархи ҳам Тожикистондагидан икки, баъзида уч баробар арзон. Айтганча, бирорта кафеда мижозларга хизмат учун қўшимча пул олишмайди.Сирдарё йўлидаги кафеда эса бизга ошни тарозида тортиб беришди. Маълум бўлишича, баъзи ўзбек кафе ва ресторанларида ош тарозида тортилиб сотиларкан — 100, 200 грамм ёки икки килограмм.
Умуман олганда бизнинг йўл бўйидаги ошхоналаримиз ўзбекларникини олдида — ҳақиқий арзон трактир.
Изоҳ (0)