Фарғона вилояти ҳокимлиги «Озодлик» радиосининг ёзёвонлик ўқитувчи ва шифокорлар Ўзбекистон Президенти ўтадиган йўлларни тозалаш ишларига жалб этилганлиги ҳақидаги хабарига раддия билдирди.
«Дарё» мухбири Азизбек Эрматов билан боғланган вилоят халқ таълими бошқармаси бошлиғи Маъруфжон Турдиматовнинг таъкидлишича, вилоятнинг Ёзёвон туманида ҳам, бошқа жойларида ҳам ўқитувчилар ободонлаштириш ишларига жалб этилгани йўқ. Бундай гаплар фақат уйдирмадан иборат. Тўғри, бугунги кунда вилоятда ҳам ободонлаштириш, кўкаламзорлаштириш ишлари олиб борилмоқда. Бу ишларга таълим соҳасидаги техник ходимлар ҳам қўлидан келганча ёрдам бермоқда. Бу бор гап.
Ёзёвон туманида 36 та умумтаълим мактаби фаолият кўрсатаётган бўлиб, унда 1 минг 550 нафар педагоглар меҳнат қилмоқда. Ўқитувчилар тумандаги ободонлаштириш ишларида умуман қатнашгани йўқ. Улар дарс ўтмоқда.
Шунингдек, ўқитувчилардан гул ва бошқа нарсалар учун ўлпон йиғилаётгани ҳам ҳақиқатдан анча йироқ, «55 миллион сўмлик гул» эса умуман тасдиқланмади.
Вилоят ҳокимининг ўринбосари Илҳомжон Носиров ҳам «Озодлик» радиоси мухбири билан мазкур масалада гаплашмаганлигини билдирди.
Айни пайтда Фарғона вилоятидаги 15 та туманнинг 30 та маҳалла фуқаролар йиғинида «Обод қишлоқ» дастури асосида катта бунёдоркорлик ишлари олиб борилмоқда. Бу ишларга фақат ободончилик ва қурилиш соҳасига оид ташкилотлар вакиллари жалб этилган.
Изоҳ (0)