Тошкент шаҳар Мирзо Улуғбек тумани ҳокимлиги ўзининг Facebook’даги саҳифасида шаҳардаги дарахтларнинг кесилишига қарши чиққан таниқли тележурналист Дилдор Исломованинг постида жавоб берди.
Тележурналист Дилдор Исломова Facebook’даги саҳифасида ўзи истиқомат қиладиган кўчада ободонлаштириш ишлари олиб борилаётгани муносабати билан ёзда аҳолига ўзининг сояси ва мевалари, шунингдек, кўркамлиги билан хизмат қилиб турган улкан дарахтларнинг кесилаётгани тасвирланган видео ва суратларни жойлаштирган эди. Журналист нима сабабдан бундай қилинаётгани, бундай кўзбўямачилик кимга керак эканлигини сўраб мурожаат йўллаган. Туман ҳокимлиги эса ушбу мурожаатга жавоб йўллади.
«Ҳурматли Дилдор Исломова!Сизнинг аввало туманимиз тақдирига бепарво ва эътиборсиз бўлмаганингиз учун ташаккур билдирамиз.
Саҳифангизга жойлаштирилган пост билан танишиб чиқиб, унга тўғри ва ишончли жавоб қайтаришга қарор қилдик.
Ушбу ҳудудни ободонлаштириш ишлари кейинроққа режалаштирилган эди, бироқ яқин кунлар ичида меҳмонларнинг ташрифи кутилаётгани сабаб жараён тезлаштирилди.
Қайд этганингиздек, ободонлаштириш ишлари фақатгина сизнинг уйингиз атрофида эмас, балки бутун Маҳтумқули кўчасида олиб борилмоқда. Шунингдек, мазкур жараён доирасида дарахтларни кесиш, уларга шакл бериш ва уларни эстетик завқ берадиган кўринишга келтириш назарда тутилган. Шаҳарни тартибли замонавий кўринишга келтириш борасидаги ҳаракатларимиз танқидга лойиқ эмас, ахир вақт бир жойда тўхтаб қолгани йўқ ва биз шаҳар ҳам тирик организм эканлигини, аҳоли кўпаяётгани, турар ва нотурар ҳудудлар борган сари ортиб бораётганини англаб турибмиз. Дарахтлар ҳам ўсади, баъзида улар ҳам қарийди, чирийди. Яшил кўкаламзорларни ёш ва соғлом бўлишини назорат қилиш осон иш эмас. Баъзида қариб қолган дарахтларни олиб ташлашга тўғри келади. Бу каби қарорларни қабул қилиш осон эмас.
Режалаштириш ҳам шунга асосан тузилади, чопилган эски дарахтлар ўрнига янгиси экилади.
Ободонлаштириш борасидаги қарор ҳудуд бўйлаб айланиб чиқилганидан сўнг қабул қилинган. 48-рақамли уйнинг фасад қисми кўп йиллардан буён таъмирланмаган ва шаҳарнинг эстетик кўринишига жавоб бермаган. Шу сабабли таъминлашга қарор қилинди. Бундан ташқари меҳмонларнинг келиши ўз уйимизни тартиб солишимизга яна бир сабаб бўлади.
Ва албатта, бу «кимнингдир келиши учун тайёрланаётган кўзбўямачилик дастури эмас», ахир бу бизнинг яшаш муҳитимиз, бизнинг уйимиз!
Биз таъмирлаш ишлари борасида аҳоли билан ўз вақтида тушунтириш ишларини олиб бормаганимиз ва бу ҳақида маълумот беришга улгурмаганимиз учун кечирим сўраймиз. Шунингдек, сизни ишонтириб айтишимиз мумкинки, ушбу иш ижрочиларининг аҳоли билан нотўғри алоқаси ҳолатлари билан шуғулланишга ваъда берамиз.
Нима бўлганда ҳам биз сиз каби фаол фуқаролик позициясига эга аҳолимизга миннатдорчилик билдирамиз ва ўз олдимизга Мирзо Улуғбек туманини шаҳардаги энг қулай, ривожланган ва экологик туманга айлантириш мақсадини қўямиз.
P.S. Ўрик дарахти чопиб ташланмади. Шунчаки унинг қуруқ шоҳлари кесилган. Умид қиламизки, мазкур дарахт яна кўп йиллар ўзининг сояси ва мазали мевалари билан сизларни хушнуд этиб келади.
Мирзо Улуғбек тумани ҳокимлиги
Изоҳ (0)