Фуқароларнинг парламент депутатларига йўллаган электрон мурожаатларини қабул қилиш ва қайта ишлаш тизими самарадорлигини ошириш мақсадида «Мулоқот» мобил дастури ишлаб чиқилди, деб ёзади ЎзА.
Олий Мажлис Қонунчилик палатасида Micros Development компанияси томонидан ишлаб чиқилган мазкур мобил дастурнинг тақдимот бўлди.
«Мулоқот» мобил дастури парламентнинг жамоатчилик билан алоқалари сифатини яхшилаш билан бир қаторда фуқаролар мурожаатини кўриб чиқиш жараёнлари устидан жамоатчилик назоратини жорий этишни таъминлайди. Дастурдан ўзбек ва рус тилларида фойдаланиш мумкин.
Мобил дастур мурожаатчиларнинг шахсга доир маълумотлари ва шахсий ахборотларни ошкор этилмаслиги ҳамда зарур хавфсизликни таъминловчи Ўзбекистон Республикаси электрон ҳукумат фойдаланувчиларини индефикация қилиш Ягона тизими OneID билан интеграциялашган.
Мобил дастур орқали мурожаатчи мурожаатни жўнатишда муаммони тезкор ҳал этишни таъминлаш мақсадида унга тегишли файлларни, расм ёки ҳужжатларни қўшиб жўнатиши мумкин. Шунингдек, зарур бўлганда харитада мурожаат билан боғлиқ объект жойлашган ерни кўрсатиш имкониятини беради.
Фуқаролар мурожаатига депутатлар томонидан кўрилган чораларнинг самарадорлигини баҳолаш учун берилган жавоблар доирасида жамоатчилик назоратини ўрнатиш мақсадида ҳар бир мурожаат тегишли базага киритилиб борилади.
Бугунги кунда мазкур мобил дастурдан Android операцион тизим учун бета режимида фойдаланиш мумкин бўлиб, Олий Мажлис Қонунчилик палатаси фаолиятини ёритувчи бир гуруҳ журналистларга синов тариқасида ишлатишга берилди. Яқин кунларда тўлиқ синовдан ўтгандан кейин «Мулоқот» дастуридан Ўзбекистон Республикасининг барча фуқаролари фойдаланиш имкониятига эга бўлади.
Изоҳ (0)