Бухоро вилояти Вобкент туман ИИБга Ҳажувон МФЙ Розгир қишлоғида яшовчи «Улуғбек Амон Замини» фермер хўжалиги раиси Улуғбек Ширинов ариза орқали мурожаат қилди. Бу ҳақда вилоят ИИБ матбуот хизмати «Дарё»га хабар бермоқда.
Фуқаро ўз аризасида фермер хўжалиги дала ҳудудида мавжуд Хитойда ишлаб чиқарилган баҳоси 6 000 000 сўмлик сув насоси номаълум шахс томонидан ўғирлаб кетилганлигини билдирган.
Олиб борилган суриштирувлар давомида ушбу жиноятни Вобкент тумани Шакаркент МФЙ Халач қишлоғида яшовчи 1958 йилда туғилган, муқаддам гиёҳвандлик билан боғлиқ бўлган жиноятларни содир этганлиги учун судланган Шамси Аминов ва унинг куёви, 1988 йилда туғилган муқаддам (Ўзбекистон Республикаси Жиноят Кодексининг 266-моддаси) (Транспорт воситалари ҳаракати ёки улардан фойдаланиш хавфсизлиги қоидаларини бузиш) судланган Мардон Эргашов ҳамда ўғли, 1983 йилда туғилган, муқаддам ўғрилик жиноятини содир этганлиги учун судланган Шуҳрат Аминовлар содир этганлиги аниқланган ҳамда ашёвий далиллар тегишли тартибда ҳужжатлаштириб олинган.
Мазкур ҳолат юзасидан Ўзбекистон Республикаси Жиноят Кодексининг 169-моддаси (ўғрилик) 2-қисми билан жиноят иши қўзғатилган. Ҳозирги кунда тергов ҳаракатлари олиб борилмоқда.
Изоҳ (0)