Maxсус қидирувдаги фуқаролар ва уларнинг яқин қариндошлари билан вилоятда амалга оширилаётган ишларга бағишланган йиғилишда Самарқанд вилояти ҳокими Туробжон Жўраев «Уларга айтинг, қайтишсин, вилоят ҳокими сифатида ваъда бераман, ҳеч бирини қамамаймиз. Президентимизнинг топшириғи бу. Уларни тўғри йўлга соламиз, иш билан таъминлаймиз, уйи бўлмаса, бу борада ҳам ёрдам берамиз», дея қидирувда юрган адашганларнинг яқинларига мурожаат этган эди.
Самарқанд вилояти ҳокимлиги матбуот хизматининг хабар беришича, мазкур йиғилишда 64 ёшли она, ургутлик Муҳайё Ходиева бир эмас, уч ўғли четда юрганини, уларнинг ёш болалари борлигини айтиб, фарзандларини қайтариш борасида ёрдам сўраган.
Орадан ҳеч қанча вақт ўтмай Муҳайё Ходиеванинг фарзандлари яна Ўзбекистонга қайтиб келди. Бир неча йиллардан буён қидирувда бўлган ака-ука Аслиддин ва Хуршид Эргашевлар ўз ихтиёри билан Ўзбекистонга қайтгани учун уларга нисбатан қамоқ чораси қўлланилмади.
«Невараларим ҳам оталари меҳрига зор эди. Ўғилларим меҳнаткаш. Энди улар бу ишончни ҳалол меҳнати, Ватанга садоқати билан оқлашига мен кафильман. Бизга шундай имкониятни берган Президентимизга минг раҳмат», — дейди Муҳайё Ҳодиева.
«Тўғри йўлдан адашиб, анча вақтни Ватанимиз, оиламиз бағридан йироқда ўтказдик. Бизга тўғри ҳаёт кечириш учун қайта имкон берилганидан мамнунмиз. Бундан тўғри хулоса чиқариб, келгусида ҳалол меҳнат қилиб, оиламиз бағрида ҳаёт кечирамиз. Бунинг учун Президентимиздан, бизни қайтишимизга кўмак берган инсонлардан миннатдормиз», — дейди Аслиддин Эргашев.
Изоҳ (0)