Ҳозирда Нидерландияда бўлиб турган Грузия собиқ президенти Михаил Саакашвили «Ягона миллий ҳаракат» партиясидаги сафдошларини мамлакатда октябр ойида бўлиб ўтадиган президентлик сайловида мухолифатдан ягона номзодни илгари суриш учун бошқа партиялар билан музокаралар бошлашга чақирди. Бу ҳақда «Интерфакс» хабар бермоқда.
«Биз 2018 йилда ҳокимиятга қайтишимиз лозим. Буни қандай амалга оширамиз? Президентлик сайловини ютиб чиқишимиз ва Иванишвилининг бошқарувини таг-туги билан йўқ қилишимиз керак», — дейилади Саакашвилининг Грузия ОАВ орқали тарқатилган партия аъзоларига видеомурожаатида.
Ҳаракат етакчиларидан бири Ника Мелия мухолифатдаги бошқа партиялар билан музокаралар бошланганини билдирди, бироқ улар қайси сиёсий кучлар эканлигига аниқлик киритмади.
Маълумот учун, мухолифат Саакашвили назарда тутган собиқ бош вазир, миллардер Бидзина Иванишвилини Грузиянинг ҳақиқий хўжайини деб ҳисоблайди.
Изоҳ (0)