WSB гуруҳ босқичи доирасида Cuba Domadores клубини қабул қилган Uzbek Tigers бокс жамоаси 4:1 ҳисобида зафар қучди. Томонларнинг Кубада кечган илк жангларида океан орти вакиллари 5:0 ҳисобида зафар қучганди.
Шу тариқа ҳар икки клуб ўз рингларида зафар қучиб, ғалаба очколарини қўлга киритди. Ўзбекистонлик ва кубалик чарм қўлқоп усталари чорак финалга йўлланма олиш учун гуруҳда асосий даъвогарлар ҳисобланади. Мазкур зонада, шунингдек, Венесуэла ҳамда Колумбия жамоалари ҳам бор.
Тошкентдаги бокс кечасининг илк жангида Ҳасанбой Дўстматов рингга чиқиб, Хоанис Аргилагосдан устун келди. Кейин эса яна бир Олимпиада чемпиони Шаҳобиддин Зоиров Робейси Рамиресни мағлуб этди.
Учинчи жангга келибгина омад кубаликлар томонида бўлди. Иқбол Холдоров Энди Крузга қарши жангда имкониятни бой берди. Мазкур ғалаба Куба учун биринчи ва охиргиси бўлди.
Чунки кейинги икки жангда ҳам Uzbek Tigers боксчилари устунлик қилди. Исроил Мадримов -75 килограмм вазн тоифасида Арлен Лопесдан устун келган бўлса, -91 килограммда Санжар Турсунов машҳур Эрисланди Савонни таслим қилишга эришди.
Uzbek Tigers — Cuba Domadores 4:1
- -49 кг: Ҳасанбой Дўстматов — Хоанис Аргилагос 3:0
- -56 кг: Шаҳобиддин Зоиров — Робейси Рамирес 3:0
- -64 кг: Иқбол Холдоров — Энди Круз 1:2
- -75 кг: Исроил Мадримов — Арлен Лопес 3:0
- -91 кг: Санжар Турсунов — Эрисланди Савон 3:0
1 март куни Uzbek Tigers жамоасини Тошкентда яна битта жанг кутиб турибди. Cuba Domadores клуби бир йил аввал Самарқандда 3:2 ҳисобида мағлуб этилганди. Орадан вақт ўтиб, ўзбекистонлик спортчиларнинг натижаси яхшиланди.
Изоҳ (0)