Хитойда ўтказилган Осиё чемпионатида ғолиб бўлган Ўзбекистон U-23 терма жамоаси бугун Тошкент вақти билан пойтахтга етиб келди. Ислом Каримов номидаги Тошкент халқаро аэропортида Ўзбекистон олимпия терма жамоаси бош мураббийи Равшан Ҳайдаровдан «Xabar.uz» интервью олди.
«Осиё чемпионатида эришилган тарихий натижа жамоамизнинг аҳиллиги, ғалабага чанқоқлиги туфайли қўлга киритилди. Биз бутун терма жамоа аъзолари — мураббийлар штаби ҳам, футболчилар ҳам бир мақсад йўлида ҳаракат қилдик. Финал учрашувида сўнгги захира имкониятидан фойдаланишдан олдин олдимда иккита йўл бор эди. Биттаси захира дарвозабонни ўйинга тушириб, пенальтилар сериясига тайёргарлик кўриш ёки ҳужумчини майдонга тушириб, қолган 2-3 дақиқа ичида гол уриш. Мен Аллоҳга таваккал қилиб, иккинчи йўлни танладим ва бу қарорим тўғри бўлиб чиқди», — дейди мураббий.
«Xabar.uz» мухбирининг гуруҳ ўйинларидаги суст, ишончсиз ўйинлардан футболчиларнинг қандай қутулгани, Қозоғистоннинг Ақтўбе вилоятида рўй берган фожиа олимпиячиларга қандай таъсир кўрсатди, кўпчилик ана шу воқеадан кейин йигитлар ўзгарди дея тахмин қиляпти, шу ростми, деган саволига қуйидагича жавоб берган:
«Ушбу фожиа барча юртдошларимиз каби бизни ҳам ларзага солди. ЎФФ президенти Умид Аҳмаджонов терма жамоага айни шу ҳақда мактуб йўллади. Биз бу хатни йигитларга ўқиб бердик. Ўзим ҳам кутилмаган фожиа оқибатида қурбон бўлганлар хотираси учун ҳам кейинги ўйинларда ғалаба қозонишимиз шартлигини уларга айтдим. Йигитлар ҳам рўй берган фожиадан қаттиқ таъсирланишди, сўзларимизнинг аҳамиятини юракдан ҳис қилишди ва буни майдонда исботлашди», — дейди Равшан Ҳайдаров.
Изоҳ (0)