Ўзбекистон олимлари томонидан маҳаллий хом ашё асосида тиш имплантантларини қоплаш учун биологик жиҳатдан фаол қатлам яратилди, деб хабар берди «Халқ сўзи».
Лойиҳа устида Тошкент давлат стоматология институти кичик илмий ходими Фарҳоджон Усмонов иш олиб бораяпти. Асосий тадқиқот ва тажрибалар якунланди. Фақатгина тиш имплантанти биофаол қопламаси самарадорлигини баҳолаш, шунингдек, уни қўллаш учун яратилган қурилмани такомиллаштириш қолди.
Фарҳоджон Усмонов мазкур таклифи билан ёш олимларнинг инновацион илмий-техник танловида ғолиб ҳам бўлди.
Фарҳоджон олий ўқув юртини тамомлагандан сўнг, тиббиёт фанлари доктори, профессор Н.Хабилов раҳбарлигида изланишлар олиб боришни бошлади ва улар Ўзбекистонда янги тузилишдаги имплантант яратиш бўйича лойиҳани рўёбга чиқариш учун грант ютиб олди. Бундан кўзланган мақсад қопламани эксперимент-клиник тадқиқотлар асосида ясаб, кейинчалик ишлаб чиқаришга татбиқ этиш эди.
Бу борадаги биринчи намуна учун Ўзбекистон Республикаси Интеллектуал мулк агентлиги томонидан патент ҳам тақдим этилди.
Изоҳ (0)