Испаниянинг WЕS (Western Export Solutions) компанияси делегацияси қишлоқ хўжалиги соҳасида лойиҳаларни амалга ошириш масалаларини муҳокама қилиш мақсадида Жиззах вилоятига келди. Бу ҳақда «Халқ сўзи» хабар бермоқда.
Хорижнинг мазкур нуфузли компанияси замонавий қишлоқ хўжалиги тизимларини жорий этиш ва Шароф Рашидов туманида агрологистика мажмуасини ишга туширишни мўлжалламоқда.
— Ушбу логистика марказини бунёд этиш лойиҳасига Испания компанияси томонидан 5 миллион евро миқдорида сармоя киритилиши режалаштирилган, — дейди Жиззах вилояти инвестиция бошқармаси бошлиғи Шерзод Иномов.
— Лойиҳанинг биринчи босқичида вилоятда йилига 50 миллион долларлик қишлоқ хўжалиги маҳсулотларини экспорт қилиш имконияти яратилади ҳамда Ўзбекистонда Европа стандартлари асосида халқаро «Global GAP» стандарти жорий этилади.
Инвесторлар Испанияда Ўзбекистон қишлоқ хўжалигини янада ривожлантириш, савдо, иқтисодий масалаларни ҳал этиш мақсадида «Испания — Ўзбекистон» жамғармаси тузилганлиги, унинг маблағлари тез кунларда турли лойиҳаларни қўллаб-қувватлаш учун йўналтирилиши тўғрисида ҳам маълумотлар берди.
Учрашувлардан сўнг меҳмонлар Шароф Рашидов туманидаги агрологистика мажмуаси учун ажратилган ер майдони билан танишди. Ушбу майдон қулай жойлашганлиги, ернинг унумдорлиги, сув ва йўл тармоқлари жойлашуви инвесторларга маъқул келди ва мазкур ҳудудда ерга дастлабки ишлов бериш, техника ва технологияларни Испаниядан олиб келиш, кадрлар тайёрлаш тизимини йўлга қўйиш, малакали мутахассисларни жалб этиш масалалари бўйича ҳам келишиб олинди.
Шунингдек, учрашувларда «Зомин-фарм» эркин иқтисодий зонаси имкониятларидан фойдаланиб, аччиқ бодом етиштириш ва уни қайта ишлаш орқали дори маҳсулотлари тайёрлаш, вилоятдаги адир ва тоғолди ҳудудларида етиштириладиган ковулни қайта ишлаш, плантациялар яратиш, тайёр маҳсулотларни Европа давлатларига сотиш масалалари ҳам муҳокама қилинди.
Изоҳ (0)