19 февраль куни «Ўзбекистон» телеканалида эфирга узатилган «Муносабат» кўрсатувининг навбатдаги сони ўғриликнинг олдини олиш ва унга қарши курашишга бағишланди. Унда ИИВ академиясида ташкил этилган илмий-амалий тадқиқотлар марказининг Тошкент шаҳрида содир бўлган 559 та ўғрилик бўйича таҳлиллари эълон қилинди.
Таҳлилларга кўра, сешанба куни ҳафтанинг бошқа кунларига нисбатан кўпроқ ўғрилик содир этилади. Жами ўғриликларнинг 18 фоиздан ортиғи ҳафтанинг 2-кунида амалга оширилган. Энг кўп ўғриликлар содир этилган кунлар учлигига шунингдек, шанба (16,6%) ва якшанба (15,9%) ҳам кирди. Энг кам ўғрилик эса чоршанба куни (10,7%) амалга оширилган.
Жиноятчилар кўпинча ўғриликни тунги соат 01:00 дан 02:00 гача (7,9%), 02:00 дан 03:00 гача (7%) ва 15:00 дан 16:00 гача (7%) бўлган вақтда содир этмоқда. Соат 06:00 дан 07:00 гача (1,6%) ва 08:00 дан 09:00 гача (1,8%) бўлган оралиқда ўғрилик нисбатан кам содир бўлган.
Ойлар бўйича таққослаганда, январь ва апрель энг кўп жиноятлар содир этилган ойлар бўлди. Ўғрилик кўрсаткичлари энг паст бўлган ойлар май ва декабрдир.
Изоҳ (0)