O‘zbekiston olimlari tomonidan mahalliy xomashyo asosida tish implantantlarini qoplash uchun biologik jihatdan faol qatlam yaratildi, deb xabar berdi “Xalq so‘zi”.
Loyiha ustida Toshkent davlat stomatologiya instituti kichik ilmiy xodimi Farhodjon Usmonov ish olib borayapti. Asosiy tadqiqot va tajribalar yakunlandi. Faqatgina tish implantanti biofaol qoplamasi samaradorligini baholash, shuningdek, uni qo‘llash uchun yaratilgan qurilmani takomillashtirish qoldi.
Farhodjon Usmonov mazkur taklifi bilan yosh olimlarning innovatsion ilmiy-texnik tanlovida g‘olib ham bo‘ldi.
Farhodjon oliy o‘quv yurtini tamomlagandan so‘ng, tibbiyot fanlari doktori, professor N.Xabilov rahbarligida izlanishlar olib borishni boshladi va ular O‘zbekistonda yangi tuzilishdagi implantant yaratish bo‘yicha loyihani ro‘yobga chiqarish uchun grant yutib oldi. Bundan ko‘zlangan maqsad qoplamani eksperiment-klinik tadqiqotlar asosida yasab, keyinchalik ishlab chiqarishga tatbiq etish edi.
Bu boradagi birinchi namuna uchun O‘zbekiston Respublikasi Intellektual mulk agentligi tomonidan patent ham taqdim etildi.
Izoh (0)