Ўзбекистон Президенти Шавкат Мирзиёев шу йил баҳор фаслида Озарбайжонга расмий ташриф билан бориши мумкин. Бу ҳақда 20 февраль куни Тошкентда бўлиб ўтган икки давлат тадбиркорлари бизнес-форумида Озарбайжоннинг Ўзбекистондаги Фавқулодда ва мухтор элчиси Гусейн Гулиев маълум қилди, дея хабар беради «Халқ сўзи».
«Президентлар бир-бирини яхши танийди, улар бир қатор халқаро майдонларда учрашишган. Аниқ санани ҳозир айтиш қийин, лекин ташриф шу йилнинг баҳори, эҳтимоли билан май ойи охирида бўлади», — деди элчи.
Дипломатнинг таъкидлашича, ташриф давомида кенг доирадаги йўналишлар, хусусан, нефть-газ, қишлоқ хўжалиги, қурилиш материаллари, озиқ-овқат саноати бўйича ҳамкорлик масалалари кўриб чиқилади.
Томонлар транспорт-логистика алоқаларини янада ривожлантириш, жумладан, Баку — Тбилиси — Карс йўлагини яратиш масаласини ҳам муҳокама этиши кутилмоқда.
Изоҳ (0)