Мальдив ороллари парламенти мамлакатдаги фавқулодда ҳолатни тобора кучайиб бораётган сиёсий инқироз муносабати билан яна 30 кунга узайтирди. Бу ҳақда «Интерфакс» хабар бермоқда.
Мамлакатда фавқулодда ҳолат 15 кун давом этди, у кеча якунланиши керак эди. Бироқ ушбу ҳолат президент Абдулла Яминнинг талабига биноан узайтирилди.
Мазкур қарор оппозиция сиёсатчилари томонидан кескин танқид қилинди.
«Ямин фавқулодда ҳолатни ноқонуний равишда белгилади ва муддатини узайтирди. У бутун мамлакат бошқарувини ўз қўлига олди ва Мальдив ороллари аҳолиси устидан диктатор сингари назорат ўрнатди», — дейди оппозициячилар етакчиси Иброҳим Муҳаммад Солиҳ.
Мальдив оролларидаги сиёсий беқарорлик январь ойининг охирида мамлакат Олий суди томонидан 9 нафар маҳбуснинг озод этилиши тўғрисида қарор қабул қилинганидан сўнг бошланган эди. Суд маҳбусларга нисбатан сиёсий важлар билан айблов эълон қилинган, деб топди.
Шунингдек, суд томонидан Мальдив парламентининг 12 нафар оппозицион аъзолари ҳуқуқларини қайта тиклаш ҳақида қарор қабул қилди ҳамда терроризмга алоқадорликда айбланаётган собиқ президент Муҳаммад Нашид иши бўйича жараённи ҳам конституцияга зид, деб топди.
Олий суд қарорига жавобан ҳукумат вердикт ижросини таъминлашга ваъда берган полиция бошлиғини ишдан бўшатди. Бундан ташқари, ҳукумат парламентнинг икки нафар оппозициячи аъзосини ҳибсга олишга буйруқ берди.
Изоҳ (0)