Волгоградда суд ижрочилари етти йилдан буён ўлган дея ҳисоблаб келинган болакайни ўз оиласига топширди. Бу ҳақда вилоят суд ижрочи хизматининг сайтига таяниб, TJournal хабар берди.
2011 йилда болакай туғилганида шифокорлар унинг онасига фарзанди бир ҳафтадан ортиқ яшамаслигини маълум қилган. Шунда аёл ўзининг турмуш ўртоғи билан маслаҳатлашиб, ундан воз кечиш ҳақида ариза ёзган. Беш кундан сўнг ота-она фарзандини қидириб яна шифохонага келган, бироқ уларга болакай ўлганини айтишган.
2017 йилда суд ижрочиларига вояга етмаган болани интернат уйда ушлаб турилгани учун унинг ота-онасидан 230 минг рубль миқдоридаги алимент пулини ундириш борасида ҳужжат келиб тушган.
Ижрочилар қарздорларни қидириш вақтида алимент тўловчиларни топа олмаган: улар кўрсатилган манзилда истиқомат қилмаган, шунингдек, уларнинг мусодара қилиниши керак бўлган мол-мулкини ҳам топишнинг иложи бўлмаган. Ижрочилар болакайнинг онасига қарашли банк ҳисобини топиб, уни блоклаб қўйган.
Нима сабабдан ҳисоби блокланганини аниқлаштириш учун келган аёлга алимент борасида тушунтириш берилган. Ҳужжатларни кўздан кечирган аёл «хушидан кетган». Аниқланишича, эр-хотин шу вақтгача ўз фарзандларини ўлган дея ҳисоблаб келган.
Эр-хотин болага нисбатан ота-оналик ҳуқуқини қайта тиклаш мақсадида судга мурожаат қилган. 2017 йилнинг охирига болакай ўзининг қонуний ота-онасига топширилган.
Изоҳ (0)