The Verge нашри Intel томонидан яратилган Vaunt «ақлли» кўзойнагини синаб кўриш имкониятига эга бўлди, деб ёзмоқда TJournal. Кўзойнакнинг ишлаб чиқарилиши 2018 йилга мўлжалланган.
Vaunt оддий кўзойнак каби кўринишга эга, унинг вазни 50 граммни ташкил қилади. Кўзойнак линзадаги голографик акс қайтаргич ёрдамида ўнг кўзнинг шох пардасида 400 га 150 пикселли тасвирни акс эттиради.
Яратувчиларнинг таъкидлашича, кўзойнакда кам қувватли лазердан фойдаланилгани сабабли унинг мазкур имконияти кўз учун хавфсиз ҳисобланади.
Тасвир шох пардада акс эттирилади, у ҳар доим кўз фокусида туради ва ҳар қандай линза билан ишлайди. Кўзойнакнинг ишига узоқни ёки яқинни яхши кўра олмаслик таъсир қилмайди.
Кўзойнак тўғри ишлаши учун ундан фойдаланишдан олдин кўз қорачиқларини ўлчаш зарур. Бу оддий кўзойнак сотиб олишдан олдин бўлгани каби стандарт жараён ҳисобланади. Текширув экранни фойдаланувчи кўриш майдонининг қулай жойига жойлаштириш учун зарур.
Кўзойнакка мослашиш кўп вақт талаб қилмайди. Уни таққан ҳолда бир вақтнинг ўзида суҳбат қуриш ва экранда бирор нарсани ўқиш мумкин. Кўзойнак Bluetooth орқали смартфонга боғланади ва ўзи учун мўлжалланган дастурлар тўпламини олади. Бу дастурлар айнан қайси эканлиги ҳозирча номаълум. Унинг омма фойдаланишига қачон чиқарилиши ҳам номаълум қолмоқда.
Изоҳ (0)