Ўзбекистон январда Россиядан 24,9 минг тонна нефть сотиб олди

2018 йилнинг январида Ўзбекистонга Россия нефти импорти 24,9 минг тоннани ташкил қилди, деб ёзади «Spot.uz».

2017 йилда Ўзбекистон Россиядан 68,2 минг тонна нефть сотиб олган эди. Хусусан, ноябрда Ўзбекистонга 30 минг тонна, декабрда — 38,2 минг тонна нефть етказиб берилган.

Ўзбекистон ва Россия 2017 йилнинг 5 апрелида Ўзбекистонга 500 минг тонна Россия нефтини етказиш ҳақидаги меморандумни имзолаган эди.

«Транснефть» вице-президенти Сергей Андронов  Ўзбекистонга 500 минг тонна нефтни етказиб беришда «Роснефть», «Газпром нефть», «Лукойл» ва «Русснефть» иштирок эта олишини айтганди.

Аввалроқ «Транснефть» расмий вакили Игорь Демин компания 2017 йил декабрида Ўзбекистонга 50 минг тонна нефть етказиб беришни режалаштираётганини айтган эди. Демин гап ҳозирча синов тариқасидаги етказиб беришлар ҳақида бораётганини аниқлик киритганди.