Ўзбекистон Президенти Шавкат Мирзиёев 2018—2022 йилларда аҳоли пунктларини бош режалар билан таъминлаш, лойиҳа ташкилотлари фаолиятини яхшилаш, шунингдек, шаҳарсозлик соҳасида мутахассислар сифатини ошириш чора-тадбирлари тўғрисидаги қарорни имзолади. Бу ҳақда, Адлия вазирлигининг Telegram’даги «Ҳуқуқий ахборот» каналига асосланиб, ЎзА хабар бермоқда.
Қарорда таъкидланишича, шаҳарлар ва қишлоқ аҳоли пунктларининг шаҳарсозлик ҳужжатлари билан таъминланмаганлиги уларда муҳандислик-коммуникация ва йўл-транспорт инфратузилмасини ривожлантиришда тўсқинлик қилувчи омил бўлиб қолмоқда. Ҳозирги вақтда 23 та шаҳар ва 994 та шаҳар посёлкаларини бош режалар билан таъминлаш талаб этилади.
Қарор билан шаҳарсозлик ҳужжатларини ишлаб чиқиш ва амалга ошириш, лойиҳа ташкилотлари фаолиятини янада яхшилаш шаҳарсозлик соҳаси мутахассислари тайёрлаш сифатини тубдан такомиллаштириш мақсадида бир қатор тадбирлар белгиланди. Хусусан, 2018 йилнинг ўзида 8 та шаҳар, 30 шаҳар посёлкаларининг бош режалари ишлаб чиқилади.
Бундан ташқари, қурилишда маркетинг, қурилишда менежмент каби таълимнинг янги талаб этилган йўналишлари очилади. Тармоқ мутахассисларининг малакасини ошириш учун тизимли асосда ҳар йили етакчи хорижий олий таълим ва тадқиқот ташкилотлари билан ҳамкорлик дастурлари ишлаб чиқилади.
Изоҳ (0)