МХХнинг янги раиси Ихтиёр Абдуллаев ким? (видео)

31 январь куни Ўзбекистон Президенти Шавкат Мирзиёев раислигида Миллий хавфсизлик хизматининг кенгайтирилган ҳайъат йиғилиши бўлиб ўтди. Президент матбуот хизмати хабарига кўра, йиғилиш соҳада амалга оширилган ишлар таҳлили ва Миллий хавфсизлик хизмати органлари фаолиятини тубдан такомиллаштириш бўйича чора-тадбирларга бағишланди.

Абдуллаев 1966 йил 22 майда Фарғона вилоятининг Учкўприк туманида туғилган. Россиядаги Перм давлат университетини ҳуқуқшунос мутахассислиги бўйича тамомлаган.

1988—1990 йилларда Фарғона шаҳар судида суд ижрочиси бўлиб ишлаган. 1990—1993 йилларда Фарғона вилояти Адлия бошқармасида маслаҳатчи сифатида фаолият кўрсатган. 1993—1995 йилларда Фарғона шаҳар судида судья, суд раиси лавозимларида ишлаган. 1995—1997 йилларда Фарғона вилоят судида судьялик, жиноят ишлари бўйича суд ҳайъатига раислик қилган.

1997—2000 йилларда Президент Давлат маслаҳатчиси хизматида фуқаролик ва амнистия масалалари бўйича референт бўлган. 2000 йилдан 2001 йилгача Андижон вилоят судига раислик қилган, 2001—2002 йилларда Президент Давлат маслаҳатчиси ўринбосари бўлган. 2002—2006 йилларда адлия вазири биринчи ўринбосари, 2006—2010 йилларда эса Президент Давлат маслаҳатчиси сифатида фаолият кўрсатган.

2010 йили Президент фармони билан Сенат аъзоси этиб тайинланган, 2015 йилда сенатор этиб қайта тайинланган. Ихтиёр Абдуллаев 2015 йил апрелида Ўзбекистон бош прокурори лавозимига киришган эди — ўшанда у 15 йил бош прокурорлик қилган Рашиджон Қодиров ўрнини эгаллаган эди.

Президент Шавкат Мирзиёев Ихтиёр Абдуллаевни аксарият ислоҳотларнинг боришини назорат қилувчи масъул этиб белгилаган эди. Ихтиёр Абдуллаев Президентнинг ишончини қозонган, жумладан, 2017 йил июнида Фарғона вилоятида бўлиб ўтган фаоллар йиғилишида Шавкат Мирзиёев ҳудудлардаги прокурорларни Ихтиёр Абдуллаевга кўмак беришга чақирган эди.