Шавкат Мирзиёев Қашқадарёга сафари доирасида Абдулла Орипов номидаги ихтисослаштирилган мактаб-интернатига ташриф буюрди. Бу ҳақда ЎзА хабар бермоқда.
2017 йил февраль ойида Президент Қашқадарё вилоятига ташрифи чоғида Қарши шаҳрида Абдулла Орипов ҳайкалини яратиш лойиҳаси билан танишар экан, лойиҳани такомиллаштириш, бу ерда Абдулла Орипов номидаги мактаб ва унинг ижодига бағишланган музей ташкил этиш зарурлигини таъкидлаган эди. Орадан қарийб бир йил ўтиб, 29 январь куни давлат раҳбари мазкур лойиҳа ижроси билан танишди.
Такомиллаштирилган лойиҳа асосида бу ерда Ўзбекистон Қаҳрамони Абдулла Орипов номидаги ихтисослаштирилган мактаб-интернати барпо этилди. Вазирлар Маҳкамасининг 2017 йил 24 майдаги «Қарши шаҳрида Абдулла Орипов номидаги она тили ва адабиёти фанини чуқурлаштириб ўқитишга ихтисослаштирилган мактаб-интернатини ташкил этиш тўғрисида»ги қарори асосида бунёд этилган илм даргоҳи олдида шоирнинг ҳайкали қад ростлади. Ҳайкал орқасидаги деворга шоирнинг шеърларидан намуналар битилди.
Мактабнинг биринчи қаватида Абдулла Орипов музейи ташкил этилди. Музейга шоирнинг буюмлари, унга қилинган турли совғалар жойлаштирилди.
Мактаб 150 ўринга мўлжалланган бўлиб, 50 ўринли ётоқхона, 50 ўринли ошхона, 200 ўринли фаоллар залига эга. Мактабга ўқувчилар бешинчи синфдан танлов асосида қабул қилинади.
Шавкат Мирзиёев мактаб фаолияти билан танишди. Музей, ўқув хоналарида бўлди, мактаб ўқувчилари билан суҳбатлашди. Мактаб ўқувчилари Ибройим Юсупов, Муҳаммад Юсуф, Ҳамид Олимжон ва Зулфия номидаги мактаблар ўқувчилари билан онлайн боғланиб, мушоира ўтказди. Ўқувчилар Абдулла Орипов шеърлари ва ўзлари ёзган шерлардан намуналар ўқиб берди.
Давлат раҳбари уларга Абдулла Ориповдек буюк шоир номига муносиб фарзандлар бўлиб камол топиш, ўз истеъдодлари билан жаҳонга машхур инсонлар бўлиб етишиш тилакларини билдирди.
Президент бир гуруҳ ўқувчиларга совғалар топширди.
Изоҳ (0)