Биринчи Президент Ислом Каримов Самарқанд шаҳридаги «Даҳбеди» маҳалласида таваллуд топган. ЎзА мазкур МФЙ раиси Орзу Раҳматовга минбар берди.
Биринчи Президент дунёга келган 1938 йил, динга қарши кураш авж олган даврда унга Ислом деб исм қўйилишининг ўзи улкан жасорат бўлган. Чунки ўша, қатағон айни авж палласига кирган йилларда исломий исм қўйиш у ёқда турсин, ислом дини ҳақида гапиришнинг ўзи хатарли эди.
Маълумотларда ёзилишича, ўша йили Самарқанд вилояти бўйича 1694 нафар ўғил бола туғилган ва фақат биттасининг исми Ислом бўлган экан. Бу саккиз фарзандни оқ ювиб, оқ тараб вояга етказган, юксак тарбия берган Абдуғани ака ва Санобар оналарнинг қанчалик жасорат соҳиби бўлганликларидан далолат.
Бугун маҳалламизда 30 нафардан ортиқ ёши 80 дан ошган нуроний отахон ва онахонлар яшайди. Уларнинг кўпчилиги Ислом Каримов билан бирга мактабга борган, ўқиган ёки бир гузарда улғайган. Уларнинг айтишича, Ислом Каримов болалигидан меҳнат ва бир бурда ноннинг қадр-қимматини яхши билган. Шунинг учун қаерда ва қандай лавозимда ишламасин, бу машаққатли даврни асло унутмади.
Айни пайтда маҳалламизда 308 хонадон, 2 мингдан ортиқ аҳоли истиқомат қилади. Улар Биринчи Президент ўсган маҳаллада яшаётганидан фахрланишади, шу номга муносиб бўлишга интилади. Маҳалламиз марказида Ислом Каримовнинг ҳаёти ва фаолиятини акс эттирувчи хона ташкил қилганмиз. Бу ерда ёшлар учун ташкил этилган махсус бурчакда улуғ давлат арбобининг болалик ва ўқувчилик йилларида олинган суратлар жамланган.
Ислом Каримов туғилиб, вояга етган хонадон барча маҳалладошлар учун энг қадрли масканга айланган. Бу ердан юртимиз турли бурчакларидан келаётган одамларнинг қадами узилмайди. Биз шундай буюк инсон билан бир маҳаллада яшаганимиздан, улғайганимиздан доимо фахрланамиз.
Изоҳ (0)