Айни пайтда танасида 16 та игна ва сим бўлаклари топилган ўн бир ойлик чақалоқ ҳақидаги хабар ижтимоий тармоқларда турли муҳокамаларга сабаб бўлмоқда. «Халқ сўзи» газетаси мухбири «Гўдакнинг умумий аҳволи қандай?», «Бу мудҳиш жиноят ким томонидан содир этилган?» каби саволларга жавоб олиш мақсадида бир қатор идораларга мурожаат қилди.
«Фарғона вилояти прокуратураси махсус хабарномасида таъкидланишича, мазкур ҳолат юзасидан Тошлоқ тумани прокуратураси ҳамда туман ички ишлар бўлими ходимларидан иборат тезкор тергов гуруҳи томонидан терговга қадар текширишлар олиб борилган. Натижага кўра, тўпланган далиллар ва иш ҳолатларидан келиб чиқиб Азизбек Абдумажидовнинг танасида аниқланган игналар ва сим бўлагини унинг танасига яқин қариндошлари ёки бошқа шахслар томонидан ташқи куч таъсири остида киритилган бўлиши мумкинлиги ҳақидаги тахминни бир қатор тергов ҳаракатлари ўтказиш орқали, яъни чуқур текширмасдан туриб ҳақиқатни аниқлаб бўлмаслиги ойдинлашди», — дейилади хабарда.
Мазкур ҳолат юзасидан жиноят иши қўзғатилди. Чақалоқ танасидаги игналар оғиз бўшлиғи орқали яқинларининг эҳтиётсизлиги натижасида танасига кириб қолганми ёки ҳақиқатан ҳам чақалоқ ҳаётига суиқасд қилинганми? Бунга терговнинг якуний натижаси орқали баҳо берилади.Соғлиқни сақлаш вазирлигидан «Дарё»га хабар беришларича, айни пайтда шошилинч тиббий ёрдам кўрсатиш илмий маркази Фарғона вилояти филиалида даволанаётган Азизбек Абдумажидовнинг аҳволи ўта оғирлигича қолмоқда.Азизбекнинг танасига бу қадар озор етказиш сабабларига тез кунларда ойдинлик киритилади, албатта. Ҳаммани ларзага солган мудҳиш воқелик қасддан содир этилган бўлса, жиноятчига жазо муқаррар.
Ғайратжон Муҳаммадиев, вилоят прокуратураси бўлим бошлиғи
Изоҳ (0)