«Ўзбеккино» миллий агентлигининг буюртмасига асосан 6 картина бўйича суратга олиш ишлари бошланди. Бу ҳақда ЎзА хабар бермоқда.
Хусусан, режиссёр Абдувоҳид Ғаниев томонидан суратга олинаётган «Элпарвар» номли бадиий фильмда ўспирин йигитнинг буюк аждодлар жасоратидан фахрланиши, унинг қалбида ватанпарварлик туйғуларининг уйғониши ва бу йўлда кўрсатган эзгу ишлари тасвирланган.
Мазкур фильмда Убайдулла Омон, Ёқуб Аҳмедов, Ёдгор Саъдиев, Дониёр Хўжаев, Бунёд Раҳматуллаев, Йигитали Мамажонов ҳамда Феруза Юсупова каби таниқли актёрларни жалб этиш мўлжалланган.
«Имом Исо ат-Термизий» номли бадиий фильм муҳаддис олим Абу Исо ат-Термизийнинг фаолияти, ҳаёти ва ижоди билан боғлиқ воқеалар хусусида ҳикоя қилади. Сценарий муаллифи ва постановкачи режиссёр – Абдуҳалил Менгноров, маслаҳатчи – Шайх Абдулазиз Мансур.
Режиссёр Акбар Бектурдиев томонидан яратилаётган «Осмон оғуши» номли бадиий фильмда учувчи бўлишни орзу қилган йигитнинг ўз мақсадига етишиш йўлидаги жонбозликлари, муҳаббати, армони ҳақидаги воқеалар Жиззах авиация билим юрти фаолияти фонида акс этади.
«Исломхўжа» номли бадиий-публицистик фильм ХХ аср бошларида Хива хонининг бош вазири, ислоҳотчи Исломхўжа Иброҳимхўжа ўғлининг бунёдкорлик ишлари ва унинг мураккаб ҳаёт тарзи ҳақида ҳикоя қилади. Картинани режиссёр Жаҳонгир Аҳмедов суратга олмоқда.
Яна бир шовшувларга сабаб бўлиши кутилаётган режиссёр Зулфиқор Мусоқовнинг «Берлин — Оққўрғон» бадиий фильмидир. Сценарийда иккинчи жаҳон уруши билан боғлиқ бўлган ўзига хос сиёсий ўйинлар фонида ўзбек ва яҳудий оилаларида кечаётган воқеалар ўрин олган.
Ҳилол Насимов томонидан яратилаётган «Ёвқурлар» бадиий фильми 2002 йили Сурхондарё вилоятининг Сариосиё ва Узун туманларида юзага келган таҳликали вазият ва ҳарбийлар кўрсатган жасорат билан боғлиқ воқеалар ҳақида ҳикоя қилади.
Изоҳ (0)