Режиссёр Жаҳонгир Аҳмедов «Исломхўжа» деб номланган тарихий, бадиий-публисистик жанрдаги фильмни суратга олиш ишларига киришди. Бу ҳақда «Ўзбеккино» МА матбуот хизмати журналист Феруз Муҳаммадга маълум қилди.
«Исломхўжа» номли бадиий-публицистик фильм сценарийси Жўрабек Рўзметов томонидан ёзилган бўлиб, фильмни режиссёр Жаҳонгир Аҳмедов суратга олмоқда. Фильмда ХХ аср бошларида Хива хонининг бош вазири, ислоҳотчи Исломхўжа Иброҳимхўжа ўғлининг бунёдкорлик ишлари ва унинг фожиаси ҳақида ҳикоя қилинади. «Исломхўжа» бадиий-публицистик фильмининг режиссёрлик сценарийсини ёзиш жараёнида ижодий гуруҳ Россиянинг Санкт-Петербург шаҳрида хизмат сафарида бўлиб, қаҳрамоннинг Россия билан боғлиқ фаолиятини ўрганиб қайтди. Бадиий кенгашнинг 2018 йил 11 январда бўлиб ўтган йиғилишида Санкт-Петербург шаҳрида танланган манзиллар ва либослар асосида фильм учун тайёрланган эскизлар ҳам муҳокама этилди. Ушбу фильмни жорий йил «Эзгу-фильм» киностудиясида суратга олиш режалаштирилган.«Ўзбеккино» МА матбуот хизмати
Изоҳ (0)