Ўн бир йиллик тақиқлардан сўнг «Руҳ 5:13» фильмининг 4-қисми суратга олинди (фото, видео)

Ўн бир йиллик тақиқлардан сўнг «Руҳ 5:13» фильмининг 4-қисми  суратга олинди. Бу ҳақда фильм режиссёри Шавкат Жайрон журналист Феруз Муҳаммадга берган интервьюсида маълум қилди.

Режиссёр «Руҳ 5:13 — 4»  фильмнинг давомини шу вақтгача суратга олмаганини қуйидагича изоҳлади:

11 йилдан буён «Ўзбеккино» томонидан бу мавзуда фильм суратга олишга рухсат берилмаган. Нима учун суратга олишга рухсат берилмаганига ҳалигача тушуна олмайман. Бўлмаса, севги-муҳаббат ва маиший мавзуларда фильмлар суратга олинаверганидан томошабинларнинг тоқати тоқ бўладиган даражага етганини барча яхши биларди. Ниҳоят, 2017 йилда фильмни суратга олишга рухсат беришди ва йил давомида фильмни суратга олдик.

Шавкат Жайрон, режиссёр

Режиссёр фильм премьераси қачон бўлишига ҳам ойдинлик киритиб ўтди.

Айни вақтда Алишер Навоий номли кино саройида ҳамда юртимиздаги бошқа кинотеатрларда бир хил вақтда фильмни премьера қилиш мақсадида, фильмнинг Алишер Навоий номли кино саройидаги катта премьерасини кейинроққа қолдирмоқдамиз. Фильмни Самарқанд, Бухоро вилоятларидаги кинотеатрларда, Тошкент шаҳрининг катта савдо мажмуаларида жойлашган кинотеатрларида ҳамда қўшни Қозоғистон ҳамда Қирғизистон Республикасининг кинотеатрларида намойиш қилиш ҳаракатидамиз. Бироз вақтдан сўнг Алишер Навоий номли кино саройида  ҳам фильмнинг катта премьераси бўлиб ўтади.

«Руҳ 5:13 — 4» фильмида бош ролларни Мадина Абдуллаева, Шуҳрат Жайрон, Шоҳиста Холматова, Шоҳрух Исломов, Азиза Арипбоева, Феруза Ҳасанова, Аслиддин Раҳимов, Дилноза Сатимовалар ижро қилди. Фильмда продюсер Мирсаид Ҳакимов, оператор Нозим Толипов, бастакор  Дониёр Саидалиевлар астойдил меҳнат қилди. Фильм намойиши 20 январдан  Андижон шаҳридаги «Ўзбегим синема» кинотеатрида бошланади.

Шавкат Жайрон, режиссёр