Биринчи ўрта-енгил вазн — 63,5 килограммда муваффақиятли одимлаб келаётган ўзбекистонлик чарм қўлқоп устаси Шоҳжаҳон Эргашев яқиндагина профессионал фаолиятидаги 12-жангида рақибини нокаутга учратди. Бунга қадар ҳам у қаршисида турган боксчиларни муддатидан аввал таслим қилишга эришганди.
Шоҳжаҳон Эргашев ўзи ҳам кутмаган бир ҳолда Сони Фредриксоннинг жағини синдириб қўйган
Шу вақтга қадар Эргашевнинг рақиблари у қадар жиддий эмаслиги борасида муҳокамалар бўлди. Аммо унинг сўнгги рақиби Сони Фредриксон ҳақида бундай деб бўлмасди. Проф рингга 18 бор кўтарилиб, уларнинг барчасида рақибларини таслим эта олган америкалик спортчига ўз мамлакатида катта умид кўзлари билан қарашарди. Эргашев эса Фредриксонни 3-раундга келибоқ нокаутга учратди.Жангдан кейин Шоҳжаҳон Эргашевнинг менежери Олег Богданов «AllBoxing.ru» нашрига интервью берди.
Шоҳжаҳон жуда пишиқ ва эпчил спортчи экани унинг биринчи жангидаёқ кўринганди. Шоҳ Уралда Денис Шафиков ҳамда Костя Пономарёвни мағлуб этгач тушуниб етдимки, у нафақат кучли зарбага эга боксчи, балки яхши таълим олган, рақиблари учун руҳий томондан ноқулай бўлган рақиб ҳамдир.Олег Богданов, менежер
Шоҳжаҳон Эргашев Россиядаги кетма-кет 10 та жангида рақибларини ер тишлатди. Шундан сўнг, океан ортига йўл олди. Бу қандай кечгани борасидаги саволга ҳам Богданов жавоб бериб ўтди.
Эргашев фаолиятини Америкада давом эттириши керак эди ва мен унинг учун океан ортидан ишончли промоутер излашни бошладим. Энг яхши таклифни бизга Дмитрий Салита берди. Шоҳ Салитанинг Россиядаги машҳур промоутерлик компанияси қарамоғида жангларини ўтказа бошлади. Кейин эса АҚШ визасини олди ва америкалик боксчиларни бир ёқлик қилиш учун Детройтга йўл олди.Дмитрий Салита ва унинг жамоасига гап-сўз бўлиши мумкин эмас. Улар Шоҳ учун идеал шароит яратиб берди. Алоҳида квартира, ошпаз, тикланиш жараёни учун имкониятлар ва энг яхши спарринг-шериклар уни кутиб турганди. Бунга жавобан Шоҳ ҳам машғулотларга борини бера бошлади. Мураббийи Шугар Хилл ва унинг ёрдамчилари билан даҳшатли даражада меҳнат қилишга киришди.
Олег Богданов, менежер
Маълум бўлишича, Америкадаги кетма-кет икки нокаутидан кейин энди Шоҳжаҳонда 2 та яхши таклиф бор. Ўзбекистонлик спортчи яқин орада улардан бирини танлаши керак бўлади.
Сўнгги жанг Шоҳ учун жуда муҳим эди. У енгилмай келаётган рақибини мағлуб этибгина қолмай, Showtime трансляцияси учун ҳам жуда яхши ишлаб берди. Бу жуда муҳим. Энди эса унга иккита таклиф бор: HBO ҳамда Showtime. Бемалол уларни таққослаб, бирини танлаши мумкин.Эргашевни Эдвин Валерога қиёслаётган америкалик шарҳловчилар фикрига қўшиламан. Унинг услуби ва харизмасида бу яққол намоён. Кейинги жангимиз апрель ойида бўлиб ўтади. Ишонаманки, Шоҳ йил сўнгига қадар асосий титул учун ҳам рингга чиқа олади.
Олег Богданов, менежер
Изоҳ (0)