Маъмурий жавобгарлик тўғрисидаги кодекснинг 47-моддасига 2018 йилнинг 9 январдаги ЎРҚ-459-сон Қонуни билан ўзгартиришлар ва қўшимчалар киритилди, деб хабар берди Norma.
Эслатиб ўтамиз, МЖтКнинг 47-моддасида 2 та маъмурий ҳуқуқбузарлик кўзда тутилган:
- ота-оналар ёки уларнинг ўрнини босувчи шахслар томонидан вояга етмаган болаларни тарбиялаш ва уларга таълим бериш борасидаги мажбуриятларни бажармаслик (шу жумладан, вояга етмаган болаларнинг маъмурий ҳуқуқбузарлик содир этишига олиб келиши) – яъни Оила кодексининг (ОК) 73-моддасида кўзда тутилган мажбуриятларни писанд қилмаслик;
- болаларнинг мажбурий умумий ўрта таълим, ўрта махсус, касб-ҳунар таълими олишига ота-оналар ёки уларнинг ўрнини босувчи шахслар томонидан тўсқинлик қилиш – яъни ОКнинг 73-моддасини бузишда фаол ҳаракатларни бажариш.
1. Ота-оналар ёки уларнинг ўрнини босувчи шахслар томонидан вояга етмаган болаларни тарбиялаш ва уларга таълим бериш борасидаги мажбуриятларни бажармаслик, шу жумладан, вояга етмаган болаларнинг маъмурий ҳуқуқбузарлик содир этишига олиб келиш ҳуқуқбузарлиги биринчи бор содир этилганида энг кам иш ҳақининг 1/2 бараваридан 3 бараваригача жаримага тортилади;
Агарда ҳуқуқбузарликнинг ушбу тури бир йил давомида таркоран содир этилса, ЭКИҲнинг (энг кам иш ҳақи — 172 240 сўм) 3—5 баравари миқдорида жаримага тортилади.
2. Болаларнинг мажбурий умумий ўрта таълим, ўрта махсус, касб-ҳунар таълими олишига ота-оналар ёки уларнинг ўрнини босувчи шахслар томонидан тўсқинлик қилиш ҳуқуқбузарлиги биринчи бор содир этилганида энг кам иш ҳақининг 5—10 баравари миқдорида жаримага тортилади.
Агарда ҳуқуқбузарликнинг ушбу тури бир йил давомида таркоран содир этилса, ЭКИҲнинг 10—20 баравари миқдорида жаримага ёки 15 сутка маъмурий қамоқ жазосига тортилади.
Мазкур ҳуқуқбузарликларни биринчи содир этганда иш Вояга етмаганлар ишлари бўйича идоралараро комиссиялар томонидан кўриб чиқилиши мумкин. Такрор содир этилганда эса – фақат маъмурий ишлар бўйича судьялар томонидан кўриб чиқилади.
Изоҳ (0)