Сирдарё вилояти Сайхунобод тумани ҳокими Носиржон Эгамбердиев ишдан олинди. Бу ҳақда, бир нечта мустақил ахборот манбаларига асосланиб, «Kun.uz» хабар бермоқда.
2016 йил октябридан бери Сайхунобод тумани ҳокими сифатида ишлаб келган Носиржон Эгамбердиев 8 январь куни ишдан бўшатилган. Унинг ўрнига шу вақтгача вилоятнинг Мирзаобод туманига раҳбарлик қилиб келган Ботир Мирзақулов Сайхунобод ҳокими этиб тайинланган.
Ҳозирча ушбу ахборот расмий манбалар томонидан тасдиқланганича йўқ. «Kun.uz» хабарида Эгамбердиев айнан нима сабабдан ишдан олинганига аниқлик киритилмаган.
Носиржон Эгамбердиев ким?
Носиржон Эгамбердиев 2016 йил октябридан Сирдарё вилоятининг Сайхунобод туманига ҳокимлик қилиб келади. Бунгача Сирдарё вилоят ўрта махсус, касб-ҳунар таълими бошқармасига раҳбарлик қилган. У ҳақдаги расмий маълумотлар шу билан тугайди — у қачон туғилган, қаерларда ишлаган — очиқ манбаларда бирор маълумот йўқ. Сайхунобод тумани ҳокимлигининг ўз сайти йўқ, Сирдарё вилояти ҳокимлиги сайти эса туман ҳокимининг сурати ва қабул кунлари ҳақидаги маълумот билан чекланган.
Эгамбердиев 2017 йил сентябрида — тумандаги мактаб директорларини Мустақиллик байрамига етарлича томошабин олиб кела олмагани учун ҳақоратлаб, «Ватанинг мустақиллиги сенинг мустақиллигинг эмасми?» дея бақириб, калтаклаётгани акс этган видео тарқалиб кетгач, йилнинг энг таниқли ўзбек амалдорларидан бирига айланди (прокуратура текшируви маълумотларида бу ҳолат «Мустақиллик байрамига қўл остидаги ходимларни маданий ҳордиқ чиқариш учун олиб келмаган таълим муассасалари раҳбарларини ҳақоратлаб, уларга қўл теккизиш» деб таърифланган).
Видео эълон қилинган куниёқ Сайхунободда вилоят ҳокими Ғофуржон Мирзаев иштирокида йиғилиш бўлиб ўтган, унда Эгамбердиев қилган иши учун ўқитувчилардан узр сўраган. Вазият юзасидан прокуратура текширув бошлаган, вилоят ҳокими эса иш узр билан битмаслиги, Эгамбердиев масаласи пахта йиғим-теримидан кейин кўриб чиқилишини маълум қилган.
Янги йил байрами арафасида Носиржон Эгамбердиевнинг иши судга оширилгани, у Маъмурий жавобгарлик тўғрисидаги кодекснинг 41-моддаси (ҳақорат қилиш, яъни, шахснинг шаъни ва қадр-қимматини қасддан камситиш) ва 183-моддаси (майда безорилик, яъни, жамиятда юриш-туриш қоидаларини бузиш) бўйича айбланаётгани маълум бўлди.
Шу билан бирга, Эгамбердиев унинг номақбул ҳаракатларини видеога олиб, унинг танилиб кетишига сабабчи бўлган Сайхунобод саноат касб-ҳунар коллежи директори Комилжон Раҳмонов устидан прокуратурага шикоят қилгани, прокуратура ҳокимнинг аризаси асосида Раҳмоновга нисбатан «фуқарога маънавий ва моддий зарар етказиши мумкин бўлган маълумотларни ошкор этиш» моддаси бўйича маъмурий ҳуқуқбузарлик тўғрисида иш қўзғагани маълум.
Президент сиёсатига қаршилар
Эгамбердиевнинг иши судга оширилгани маълум бўлгунига қадар жамоатчилик Андижон шаҳри ҳокими Дилмурод Раҳматуллаевнинг ёмон маънода танилиб, сўнг жазоланишига ҳам гувоҳ бўлиб улгурди. Ҳоким Раҳматуллаевнинг дастлаб шаҳардаги коллеж директорларини, кейинроқ маҳалла фаолларини ҳақоратлаётгани ёзилган аудиолар ОАВда эълон қилинди. Прокуратура биринчи ҳолат бўйича текширув олиб бориб, ишни судга оширди ва якунда Раҳматуллаев энг кам иш ҳақининг 30 баробари миқдорида жаримага тортилгани маълум бўлди.Мавзуга доир: Андижон шаҳри ҳокими жаримага тортилди. Мактаб директорларига қўл кўтарган Сайхунобод ҳокими-чи?
Изоҳ (0)