Ўзбекистон Президентининг 2017 йил 29 декабрдаги «Хусусий тиббиёт ташкилотларини янада ривожлантириш бўйича қўшимча шарт-шароитларни яратиш тўғрисида» қарорининг 6-бандига мувофиқ, мулкчилик шаклидан қатъи назар, барча тиббиёт ташкилотларида меҳнат қилаётган шифокор-пенсионерларга пенсиялар тўлиқ — 100 фоиз миқдорида тўланиш тартиби белгиланди. Бу ҳақда Соғлиқни сақлаш вазирлиги ахборот хизмати «Дарё»га маълум қилди.
Бунгача тиббиёт муассасасида ишлаётган пенсионер-шифкорлар ҳар ой 50 фоиз миқдорида пенсия оларди. Янги тартибга кўра, олинаётган пенсиянинг умумий миқдори икки маротабага ортди.
Масалан, рентгенолог-шифокор ҳар ойда ўртача 500 минг сўм ҳисобидан, бир йилда жами 6,0 миллион сўм пенсия олган бўлса, 2018 йилда эса икки баробар кўп — 12,0 миллион сўм пенсия олади.
Ҳозирда туман (шаҳар) Пенсия жамғармаси бўлимларида шифокор-пенсионерларнинг Ф-25 шаклдаги топшириқномаларига пенсия миқдорини 100 фоизга етказиш юзасидан тегишли ўзгартиришлар киритиш чоралари кўрилмоқда.
Амалда ўрнатилган тартибга мувофиқ, 2018 йилнинг январь ойи учун барча ишловчи шифокор-пенсионерларга 100 фоиз миқдордаги пенсия тўлови февраль ойида, иш ҳақининг иккинчи қисми тўлови амалга ошириладиган муддатларда тўланади.
Маълумот учун, ҳозирда Ўзбекистон соғлиқни сақлаш тизимида 11 мингдан зиёд пенсионер-шифокорлар ишлаб келмоқда.
Илгари, Ўзбекистон Президентининг «Ишловчи пенсионерларга пенсияларни тўлаш тўғрисида»ги фармонига мувофиқ, қуйидаги тоифадаги ишловчи пенсионерларга пенсиялар тўлиқ миқдорда тўланар эди:— уруш ногиронлари ва қатнашчиларига, Иккинчи Жаҳон уруши йилларида ҳарбий хизматни ўтаган ёки фронт ортида ишлаган шахсларга, I ва II гуруҳ ногиронларига, Чернобил ҳалокатидан зиён кўрган фуқароларга;— шунингдек, фуқаролар йиғинлари ва маҳаллаларнинг раисларига, уларнинг диний-маърифий ва маънавий-ахлоқий тарбия бўйича маслаҳатчиларига, «Нуроний» жамғармасининг барча ходимларига.
Изоҳ (0)