Кобулдаги полиция пости яқинида худкуш террорчи портлаш уюштирди

4 январь, пайшанба куни Кобулнинг тўққизинчи туманидаги Банои даҳасида юз берган терактда 15 киши ҳалок бўлди ва камида 20 киши яраланди, деб ёзади «Интерфакс». Бу ҳақда Tolo News телеканали гувоҳларга таяниб хабар берган.

«Дастлабки маълумотларга кўра, худкуш террорчи Банои даҳасида полиция бўлинмаси постига яқин келиб, ўзини портлатган», — дейилади телеканал хабарида.

حملۀ انتحاری در کابل جان پانزده تن را گرفتhttps://t.co/SRdulaw0fr pic.twitter.com/BC2pcXUiuY

— TOLOnews (@TOLOnews) January 4, 2018

Мамлакатда фаолият олиб борувчи экстремистик гуруҳларнинг ҳеч бири ҳужум учун жавобгарликни зиммасига олганича йўқ.

Ушбу туманда 4 январь куни эрталаб спиртли ичимликларнинг ноқонуний сотилиши юзасидан дўкондорлар ва полиция ходимлари ўртасида тўқнашув юз берган. Оқибатда бир нафар савдогар ҳалок бўлган, яна тўрт киши яраланган. Шундан кейин ўнлаб маҳаллий фуқаролар норозилик намойишига чиққач, туманга қўшимча ҳуқуқ-тартибот кучлари киритилган.