Саудияда аёл гроссмейстерлар рўмол ўраши шарт эмас. Қатар ва Эрон шахматчиларига виза бор, Исроилга эса йўқ

Рапид ва блиц йўналишларидаги шахмат бўйича Жаҳон Чемпионатига мезбонлик қилаётган Саудия Арабистони бир қатор масалаларда гроссмейстерлар учун қулайликлар яратди. Бу ҳақда «Оламспорт» нашри хабар берди.

King Salman World Rapid and Blitz Chess Championships мусобақасида иштирок этаётган аёл гроссмейстерларга либос чеклови қўйилмади. Саудия Арабистони ҳукумати уларга ўзлари истаган либосда дона суриш имкониятини тортиқ қилди. Бундай ҳолат тарихда илк бор кузатилган.

Мамлакатлар ўртасидаги келишмовчиликларга қарамай, Саудия ҳукумати Қатар ҳамда Эрон шахматчиларига виза беришни лозим деб топди. Бироқ Исроил масаласида саудияликлар ўз принципларини сақлаб қолди ва исроиллик гроссмейстерларни мамлакатга киритишни истамади.

Аввалроқ Саудия шахмат бўйича Жаҳон Чемпионатлари тарихидаги энг катта мукофот пулини ваъда қилгани очиқланганди. Унга кўра, эркаклар ўртасидаги мусобақада ғолиб чиққан гроссмейстер 1 миллион 250 минг АҚШ долларини қўлга киритиши, аёл шахматчиларнинг энг яхшиси эса 750 минг долларга эга бўлиши айтилганди.

Рустам Қосимжонов ва Гулруҳбегим Тоҳиржонова умумий 2 миллион АҚШ доллари учун курашга киришди