Қирғизистоннинг Тошкентдаги элчихонасида «2017 йилда Ўзбекистон—Қирғизистон ҳамкорлиги ҳамда 2018 йилда ушбу алоқаларни янада ривожлантириш истиқболлари» мавзусида брифинг ташкил этилди. Бу ҳақда ЎзА хабар бермоқда.
Унда Қирғизистоннинг Ўзбекистондаги Фавқулодда ва мухтор элчиси Дониёр Сидиқов икки мамлакат ҳамкорлигининг янги босқичи ва уни янада тараққий эттириш юзасидан амалга оширилаётган ишлар ҳақида журналистларга маълумот берди.
2017 йил мамлакатлар ўзаро муносабатлари ривожида тарихий давр бўлди. Ўзбекистон ва Қирғизистон Президентлари шу йилнинг ўзида 6 маротаба учрашди. Икки томонлама ҳамкорлик бўйича ҳукуматлараро, парламентлараро ва идоралараро ташрифлар амалга оширилди. Ишбилармон доиралар иштирокида бизнес-форумлар, миллий маҳсулотлар кўргазмалари ўтказилди. «Тошкент – Андижон – Ўш – Иркиштом – Қошғар» йўналиши бўйича биринчи халқаро автокарвон муваффақиятли ташкил этилди.
Қирғизистон президенти Сооранбай Жеенбековнинг жорий йил декабрь ойида Тошкентга амалга оширган илк ташрифи «Ўзбекистон ташқи сиёсатида Марказий Осиё— бош устувор йўналиш» тамойилининг яна бир ёрқин ифодаси бўлди.
2018 йилда барча соҳалар сингари савдо-иқтисодий алоқаларни янада ривожлантириш, товар айланмасини 500 миллион долларга етказиш режалаштирилган. Ўзбекистонда Қирғизистон маданияти ва санъати кунларини ўтказиш, Чингиз Айтматов таваллудининг 90 йиллигини кенг нишонлаш кўзда тутилган.
Изоҳ (0)