Ўзбекистон ва Қирғизистон ҳукуматлари ўртасида чегара вакиллари фаолияти тўғрисидаги битим кучга кирди. Бу ҳақда Ўзбекистон ТИВ хабар берди.
Мазкур ҳужжат томонлар чегара вакилларининг давлат чегарасидаги чегаравий можаролар ва низоларни ҳал қилиш билан боғлиқ масалаларни ечиш бўйича фаолиятини тартибга солади.
Битимга мувофиқ, чегара вакиллари участкалари доирасида ўз фаолиятида:
Давлат чегарасини кесиб ўтиш бўйича ўрнатилган қоидаларга риоя этилишини назорат қилади ва уни белгиланган тартибни бузган ҳолда кесиб ўтишни олдини олиш бўйича чоралар кўради;
Ваколатли давлат органлари билан биргаликда ноқонуний мигрантларни депортация қилиш (топшириш) ва контрабандага қарши курашиш бўйича зарур чораларни кўради ва давлат чегарасида хўжалик ишларини амалга оширилиши ҳамда чегара сув ҳавзалари сувидан фойдаланиш, овчилик ва балиқчилик қоидаларига риоя қилиш назоратини таъминлайди;
Давлат чегаралари орқали ёнғинлар, эпидемиялар, эпизоотиялар ва қишлоқ хўжалиги зараркунандаларининг тарқалиши хавфи туғрисида бир-бирларини ўз вақтида хабардор қилади.
Ушбу икки томонлама ҳужжатнинг кучга кириши давлат чегарасида юз бераётган масалаларни ўз вақтида ечиш учун қўшимча ҳуқуқий механизм сифатида хизмат қилади.
Изоҳ (0)