Наманган вилоятининг Янгиқўғон туманида янгиланган намунавий лойиҳалар асосида бунёд этилган уй фойдаланишга топширилди. Бу ҳақда «Дарё»га туман ҳокимлиги ахборот хизмати хабар берди.
Туман марказидаги Бешбулоқ даҳасида қад ростлаган 3-қаватли, 18 хонадонга мўлжалланган уй «Янгиқўрғон капитал қурилиш» МЧЖ томонидан 6 ойда қуриб битказилди. Бунинг учун 1,1 миллиард сўм сарфланди. Ундаги икки хонадон ногиронлиги бўлган шахслар учун ажратилди.
«Болалигимдан 1-гуруҳ ногирониман. Ота-онам ўтганидан сўнг акамнинг қарамоғида яшаб қелаётгандим. Янги уйдан икки хонали хонадон берилди. Ичида ҳамма нарса — юмшоқ ва қаттиқ мебел, телевизор, газ плита, кир ювиш машинасигача бор. Олдинроқ тикув машинаси ҳадя қилишганди. Дастлабки бадал давлат томонидан тўлаб берилди, қолганини ўзим меҳнат қилиб узаман», — дейди янги хонадон соҳибаларидан бири Моҳира Имомбоева.
Туманнинг Исковот қишлоғида Зарбдор маданият ва аҳоли дам олиш маркази ҳам фойдаланишга топширилди. «Янгиқўрғон қурилиш-монтаж» МЧЖ томонидан капитал таъмирдан чиқарилган бинога давлат бюджетидан 606 миллион cўм харажат қилинди, моддий-техник жиҳозлар харид қилиш учун 58 миллион сўм ажратилди.
Қишлоқдаги 20 минг аҳолига маданий хизмат кўрсатадиган марказда 500 ўринли концерт зали, 5 та тўгарак хонаси мавжуд. Уларда фольклор, рақс, рубоб ва доирадан сабоқ олиш мумкин, қизлар учун эса «Моҳир қўллар»га айланиш имконияти яратилган.
Очилиш маросимларида вилоят ҳокими Хайрулло Бозоров иштирок этди ва сўзга чиқди.
Изоҳ (0)