«Ўзбекистон» телеканалининг «Учбурчак» ток-шоусининг сўнгги — 23 декабрда эфирга узатилган сони ижтимоий тармоқларда шов-шувлар, қизғин ва муросасиз муҳокамаларга сабаб бўлди. Кўрсатувнинг бош қаҳрамони — Мухлиса исмли аёл.
Мухлиса қайнотаси унга севги изҳор қилгани, шу сабаб оиласи бузилиб кетаётганидан шикоят қилган. Кўрсатувда аёлнинг келинлик ва қизлик маҳалласидан фаоллар, у истиқомат қиладиган туманнинг психологи ҳам қатнашган ва бу масала юзасидан уларнинг ҳам фикри олинган. Мухлисадан ташқари, унинг эрининг исми Қаҳрамон экани маълум, бошқа тафсилотлар — нафақат қариндошларнинг, балки таклиф қилинган фаолларнинг ҳам исм-фамилияси, қаердан эканлиги кўрсатувда айтилмаган.
Мавзуга доир:— «Эрим ичиб келиб, қизимни яланғоч ваннага тушишга мажбур қилади». Фарзанди тирик етим бўлишига рози мирободлик аёл ҳикояси;— «Эримни овсиним билан тутиб олганман». «Ўзбекистон» телеканали хиёнатга учраган аёлларнинг сўзларини эфирга олиб чиқди
Мухлисанинг ҳикояси
18 ёшимда совчилар орқали турмушга чиққанман. Келин бўлиб тушганимга тўрт йил бўлган. Уч ёшли фарзандим бор. Қайнота, қайнонам, хўжайиним билан уч йил бахтли яшадим.
64 ёшли қайнотам аввалига хонамизни пойлаётганини сезиб қолдим. Эримга айтсам, ишонмади. Сўнг бир кун хонамиз чироғини ўчириб, кутдим — қайнотам деразамиз тагига келганида, эримни уйғотиб кўрсатдим. Эрим бу ҳақда қайнонамга айтишимни сўради. Қайнотам нафақат хонамиз деразаси остида, балки ҳаммомдалигимда унинг орқасидаги молхонада ҳам мени пойлаган. Лекин буни исботлаб бера олмадим. Қайнотамнинг бу ҳаракатлари ҳақида қайнонамга айтганимда: «Бунақа бўлиши мумкин эмас, дадангиз қарилар-ку», деган эдилар.
Бир кун ҳовлида бир ўзим қолиб кетганимда (эрим ҳашарга кетган, қайнонам кўчага чиқиб кетган эди), қайнотам хонасидан чиқиб, мени чақирди. «Ҳа, нима?», десам, «Буёққа кел, қўлингдан бир ўпай», деди. Уйдан қочиб чиқиб, овсинимнинг қизини чақириб келдим. Эртаси куни уйда кўпчилик бор эди, ошхонада овқат қилаётганимда қайнотам олдимга келиб: «Мен сени севиб қолдим», деди; мени кийимсиз ҳолда кўрган эканлар, шундан кейин яхши кўриб қолган эканлар.
Ўша куни уйда овсиним бор эди — унга бор гапни айтиб берганимдан кейин, у «ёнимдан кетма» деди, кун бўйи унинг ортидан юрдим; овсиним бу хонадонга келин бўлиб тушганига 10 йилча бўлган, у билан ҳеч қачон бундай ҳодиса юз бермаган экан.
Мени қизлик уйимга фақат қайнотам машина олиб бориб, олиб қайтарди. Машинада ҳам ҳар хил гапларни гапирардилар, ортиқ улар билан бормайман деб эримга айтганимда, сени фақат дадам олиб борадилар, деб айтганлар. Қайнотам оёқларини ҳам фақат менга ювдирардилар, юваётганимда елкамдан силаб қўйиш одатлари чиққанидан кейин бу ишни умуман қилгим келмай қолган. Эрим буларни ўзи кўриб турган.
Эрим ҳам, қайнонам ҳам менга ишонмади. Эрим: «Дадамни жиннига чиқардинг!», деб урди ҳам. Охири катта жанжал бўлиб кетганида эрим: «Дада, бу нима қилганингиз, келиб-келиб менинг хотинимга осиласизми, кўчадаги бўлса ҳам индамас эдим», деди. Кейинроқ қайнотам тан олиб: «Кечир ўғлим, мени шайтон йўлдан урди, билмасдан шунақа иш қилиб қўйдим», деди. Бу гаплардан ўз ота-онам хабар топганидан кейин, келиб, мени олиб кетишди.
Ҳозир эрим томон ажрашиш учун судга ариза берган. Мен оиламдан ажралишни истамайман. Эрим: «Онам ва отамдан узр сўрасанг бўлди, уйимиз эшиги сен учун очиқ», деб айтяпти. Маҳалла-кўй ҳам қайнотамнинг ҳисобидан алоҳида, намунавий уй олиб беришни ваъда қилган. Бироқ қайнотамга ишонмайман, яна шундай воқеалар юз беришидан қўрқаман.
Қайнота, эр, отанинг фикри
Кўрсатув ижодкорлари Мухлисанинг қайнотаси, эри ва отаси билан телефон орқали боғланган. Қайнотанинг айтишича, «севги изҳори» ҳақидаги гап-сўзлар — бўлмаган гап, бўҳтон. Эр ҳам бу гапларни «туҳмат» деб атаган. Уларнинг айтишича, Мухлиса, хусусан, оёғи оғрийдиган қайнонасига қарамаслик ва бўлак бўлиб чиқиш учун шу бўҳтонни бошлаган.«Болаларимни қандай кўрсам, сени ҳам шундай кўраман, қизимни узатганман, қизимнинг ўрнида қизсан, набирамнинг ўрнида набирамсан, деганман», — дейди қайнота. Унинг қўшимча қилишича, Мухлиса эри билан мунтазам жанжаллашган (аёлнинг қўшимча қилишича, қайнотаси айнан шуни — «улар жанжаллашаверарди» деган гапни ушлаб олган: «Деразамиз остига ҳам яна жанжаллашмаяптими, деб хабар олгани келиб турганмишлар»).
Мухлисанинг отаси эса қайнотаси қизига севги изҳор қилганини эшитганидан сўнг, «бу гапга чидай олмай» уни бориб олиб келганини айтган. «Ҳамма жойда, ким бўлса ҳам, мен жавоб бераман. Чунки қиз меники, қизим учун ҳамма нарсага тайёрман», — деди аёлнинг отаси.
Маҳалла фаоллари, туман психологининг фикри
Мухлисанинг келинлик маҳалласи вакили қайнотанинг оиласига «салбий характеристика» беролмаслигини айтган. «Жуда ибратли оила, бу оилада тартиб-интизом биринчи ўринда. Келин-боланинг гапига қўни-қўшниларнинг ҳам ишониши қийин», — деди маҳалла қўмитаси вакили. Айни вақтда, у маҳалланинг мақсади — оилани яраштириш эканини айтиб, «ярашиб кетади, деб ўйлаймиз», деб қўшимча қилди.
Мухлисанинг қизлик маҳалласи аёлга ҳам, унинг ота-онаси оиласини ҳам «яхши» деб атади. «Қайнота билан боғлиқ ҳолатни ҳеч ким кўрмагандек, биз учун ҳам. Лекин эр-хотиннинг ярашиб, оиланинг яшаб кетиши учун учқун бор», — деди маҳалла вакили. «Мухлиса туҳмат қилмаяптими?», — деган саволга маҳалла вакили: «Қизимиз — яхши қиз», деб жавоб берди.
Туман психологининг айтишича, Мухлисанинг қайнотаси уйида ота, қизлик уйида эса она ҳукмрон, унинг ўзи ҳам онаси билан жуда кўп мулоқотда бўлади. У 65 ёшга тўлаётган кекса кишининг хатти-ҳаракатларида Мухлиса шилқимлик сифатида қабул қилиши мумкин бўлган жиҳатларини сезмаганини айтди. У бу гапни «нейтрал бўлиб айтаётгани»ни алоҳида таъкидлаган. «Лекин бу қиз алдаяпти, деган хулоса чиқариш ҳам қийин», — деди туман психологи. Унинг қўшимча қилишича, Мухлисанинг тўрт йиллик турмуши давомида у ва эри ўртасида мунтазам жанжал бўлган.
Кўрсатув давомида сўз олган томошабинлардан бири Мухлисанинг сўзларини шубҳа остига олиб, қуйидагича фикр билдирди: «Нега икки катта келинга бўлмаган бундай муносабат бу келинга бўлди? Нима, улар бу қиз каби ҳурлиқо эмасми? Аёл ҳар қандай эркакка қаттиқроқ гапириб, уни ўзидан нари қилиш мумкин. Бир нима бўлганки, бу қиз қайнотасини ўзига жалб қилиб қўйган. Қайнота ўзидан ўзи келиб севги изҳор қилмайди, ‘кел, қўлингдан бир ўпай’, демайди. Балки қайнота молхонага ўзича киргандир — бу келин ҳам ҳаммомга парда тортиб қўйсин эди. Бу қиз айтаётган воқеа бўлмагани учун, бу каби гап-сўзларга орияти йўл қўймагани учун ҳам бугунги кўрсатувда на қайнота, на қайнона ва на эр бор».
Изоҳ (0)