Ўзбекистон Президенти Шавкат Мирзиёев 22 декабрь куни Олий Мажлисга йўллаган Мурожаатномасида «одамлар билан гаплашишни билмайдиган, аввалгидек маданиятсиз гаплар билан мажлис ўтказадиган учта район ҳокими» жазога тортилганини маълум қилган эди. Давлат раҳбари жазога тортилганларнинг кимлигини айтмаган эди. 26 декабрь куни Ўзбекистон Бош прокуратураси таълим муассасалари раҳбарларини ҳақорат қилган Андижон шаҳар ҳокими Дилмурод Раҳматуллаев жаримага тортилгани ҳақида хабар берди. Бу — у ёки бу ҳудуд раҳбарининг жамоатчилик таъсири остида қонуний жазога тортилиши билан боғлиқ, таъбир жоиз бўлса, биринчи ҳолат.
Андижон шаҳар ҳокимига энг кам иш ҳақининг 30 баробари миқдорида жарима солинди. Дилмурод Раҳматуллаев 16 октябрь куни пахта йиғим-теримига ҳашарчиларни жалб этиш масаласида ўтказилган йиғилишда шаҳардаги бир қатор таълим муассасалари раҳбарларини ножўя сўзлар билан ҳақорат қилган, жумладан, ҳокимликнинг топшириғини бажармаган коллежларнинг директорларини «Андижон шаҳрининг душманлари» деб атаган. Ҳокимнинг ҳақоратли чиқиши ёзилган аудиоёзув ноябрь ойида ОАВ томонидан эълон қилинган. Уни ҳатто давлат ахборот агентлиги — ЎзА ҳам танқид қилиб, қоралаб чиқди.
6 декабрь куни Бош прокуратура Раҳматуллаевнинг бу ҳаракатлари Андижон вилоят прокуратураси томонидан ўрганилаётганини эълон қилди. Бош прокуратуранинг 26 декабрдаги ахборотида қайд этилишича, суд Андижон шаҳар ҳокимини Маъмурий жавобгарлик тўғрисидаги кодекснинг 41-моддасида назарда тутилган маъмурий ҳуқуқбузарлик (ҳақорат қилиш, яъни, шахснинг шаъни ва қадр-қимматини қасддан камситиш)ни содир этганликда айбдор деб топган ва уни энг кам иш ҳақи (ЭКИҲ)нинг 30 баравари (27 декабрь ҳолатига кўра — 5 167 200 сўм) миқдорида жарима солган. Мазкур модда бўйича энг оғир жазо — ЭКИҲнинг 40 баравари миқдоридаги жаримадир.
Дилмурод Раҳматуллаев фақат бир ҳолат бўйича жазоланди. Андижон шаҳар ҳокими иши бўйича суд қачон бўлгани Бош прокуратура ахборотида айтилмаган, бироқ суд фақат 16 октябрдаги ҳолатни кўриб чиққани билдирилган. Қайд этиш жоиз, декабрь ойи бошида Раҳматуллаев иштирокида бошқа бир муаммоли аудиоёзув пайдо бўлган эди — овоз 11 ноябрдаги йиғилишда ёзиб олинган ва унда металлолом тўплаш масаласиси кўриб чиқилган. «Kun.uz»нинг ёзишича, Андижон шаҳри ҳокими бу йиғилишда ўтирганларни нафақат уятли сўзлар билан сўккан, балки мажбурий меҳнат ва қонунларда назарда тутилмаган ҳолат бўйича мажбуриятларни бажаришга ундаган. Иккинчи ҳолатга на Бош прокуратура ва бошқа ваколатли органлар муносабат билдирди.
Мактаб директорларига қўл кўтарган Носиржон Эгамбердиев масаласи ҳамон очиқ қолмоқда. Андижон шаҳри ҳокими билан вазият ноябрь ойида кўтарилиб, маълум бўлмоқда, декабрда ўзининг дастлабки мантиқий якунига етди. Бироқ ҳокимларнинг зўравонлиги билан боғлиқ 2017 йилнинг биринчи шов-шувли воқеаси Сирдарё вилоятида юз берган эди — Сайхунобод тумани ҳокими Носиржон Эгамбердиев сентябрь ойи бошида вилоятдаги Мустақиллик байрамига етарли миқдорда иштирокчи олиб кела олмаган мактабларнинг директорларини йиғилишда турғазиб қўйиб, уларга қўл кўтарган эди.
Видео ОАВда эълон қилинган кунининг ўзидаёқ Сирдарё вилояти ҳокими Ғофуржон Мирзаев Сайхунободда йиғилиш ўтказгани, ҳоким Эгамбердиев қилган иши учун ўқитувчилардагн узр сўрагани ҳақида хабарлар пайдо бўлган эди. Ўша йиғилишда Эгамбердиев биргина узр билан қутула олмаслиги ва «унинг иши пахта терими мавсумидан сўнг кўриб чиқилиши» айтилган. 13 сентябрь куни Бош прокуратура бу ҳолат бўйича баёнот бериб, Эгамбердиев атрофидаги вазият Сирдарё вилоят прокуратураси томонидан текширилаётгани, Бош прокуратура текширувнинг боришини назоратга олганини эълон қилган эди.
«Kun.uz»нинг ёзишича, 19 декабрь куни Эгамбердиевнинг ҳаракатлари юзасидан олиб борилган текширув бўйича изоҳ сўраб Сирдарё вилоят прокуратурасига мурожаат қилинган. Маълум бўлишича, вилоят прокуратураси ўтказган текширув якунланиб, натижаси Бош прокуратурага тақдим этилган. Вилоят прокуратураси вакиллари 19 декабрь куни текширув бўйича хулосани «Kun.uz»га бир соат ичида тақдим этишни ваъда берган. «Афсуски, бу ваъда берилганига бир ҳафта бўлди», — деб ёзади «Kun.uz» мухбири.
Таълим муассасалари раҳбарларига нисбатан зўравонлик қилган ҳар иккала ҳоким таълим соҳасидан чиққан. Носиржон Эгамбердиев 2016 йил октябрида Сайхунобод тумани ҳокими этиб тайинлангунига қадар Сирдарё вилоят ўрта махсус, касб-ҳунар таълими бошқармасига раҳбарлик қилган. Дилмурод Раҳматуллаев эса 11 йил давомида Андижон вилоят халқ таълими бошқармасига раҳбарлик қилган. Маълумотларга кўра, 2015 йили унга қарши иш очилган, шу боис бошқарма раҳбарлигидан олинган. 2016 йилда эса Андижон шаҳрига ҳоким этиб тайинланган.
Шавкат Мирзиёев муштумзўр ва зўравон ҳокимларни «Президент сиёсатига қаршилар» деб атаган. Ўзбекистон Президенти раислигида 15-декбар куни бўлиб ўтган видеоселектор йиғилишида Шавкат Мирзиёев қўл остидаги ходимларни беҳурмат қилиб, ҳақорат қилаётган, ҳатто уларга қўл кўтараётган раҳбар ходимларни қаттиқ танқид қилган. «Барча бўғинлардаги раҳбарлар — у вазир ёки ҳоким бўладими, идора ёки ташкилот бошлиғи бўладими — бир ҳақиқатни жуда чуқур тушуниб олишингиз шарт: бундай ҳаракатлар давлат сиёсатига, Президент сиёсатига қарши чиқиш деб баҳоланади ва айбдорларга, албатта, тегишли жазолар қилинади», — деган эди Президент.
Шавкат Мирзиёев Олий Мажлисга Мурожаатномасида ҳам бу масалага тўхталиб ўтди. У ҳокимларни маданиятсизликда айблаб, бировни ҳақорат қилиш учун уларга ҳеч ким ҳуқуқ бермаганини эслатиб ўтган.
«Одамлар билан гаплашишни билмайди. Олдинги даврлардагидек маданиятсиз гаплар билан мажлислар ўтказади, одамларни ҳақорат қилади. Ким уларга ҳуқуқ берибди? Ҳокимга ким ҳуқуқ берган бировларни ҳақорат қилишга? Бу нимадан далолат? Маданиятсизлигимиздан далолат! Ўқимаганимиздан далолат! Маънавиятимиз пастлигидан далолат!», — деган эди давлат раҳбари.
Изоҳ (0)