Супер Лига футболчилари ЎФФ жорий қилган нормативдан ўта олмаяпти. Кўрсаткичлар жуда паст

Ўзбекистон футбол федерацияси тарихда илк бор Супер Лига футболчиларидан норматив қабул қилмоқда. Унга кўра, чемпионатда иштирок этиши керак бўлган клублар ЎФФ белгилаб белган меъёрлар бўйича синовдан ўтиши шарт.

Нормативлар 4 босқичдан иборат бўлади:

• 30 метрга югуриш;
• Турган жойидан узунликка сакраш;
• 7х50 метрга югуриш;
• «Yo-Yo» тест.

ЎФФ талабига кўра, мазкур нормативларни топшира олмаган футболчилар Супер Лига учун рўйхатдан ўтказилмайди. Айни вақтда клублар биринчи нормативларни топшириб кўрмоқда. Ундан йиқилган футболчилар, мавсум бошида яна бир бор имтиҳонга ташриф буюради. Унда ҳам синовлардан йиқилса, Супер Лигада футбол ўйнамайди. Клуби билан шартномаси бор ёки йўқлиги иккинчи масалага айланади.

Ташкилот матбуот хизмати тақдим этган материалда футболчиларнинг натижалари жуда паст эканини кўриш мумкин. Масалан, Супер Лигага қадам қўйган «Цементчи» футбол клубининг имтиҳон топширган 21 нафар футболчисидан ҳеч бири 50 метрга 7 марта бориб келиш синовидан ўта олмаган. Мазкур ҳолат мавсум олдидан ҳам такрорланса, Қувасой клуби юқори дивизионда қайси футболчилар билан ўйнаши маълум эмас.

50 метр масофага 7 марта югуриб келишда «Олмалиқ»нинг 6 фоиз футболчисигина ЎФФ талабларига жавоб берган. Бу кўрсаткич «Машъал»да 16 фоизни, «Қўқон-1912» клубида 4 фоизни, «Навбаҳор»да эса 20 фоизни ташкил қилади.

«Yo-Yo» тест борасида «Навбаҳор» 38 фоизлик кўрсаткич қайд этган. «Қўқон-1912»нинг 29 фоиз футболчиси синовдан муваффақиятли ўтган. Мос равишда «Олмалиқ» 17 фоиз, «Машъал» ҳамда «Цементчи» 9 фоиздан натижа қайд этган.

Аввалроқ номуайян муддатга футболдан четлаштирилган «Нефтчи» клуби бош мураббийи Вадим Абрамов ЎФФ синовларини афсонавий Бобби Чарльтон ҳам бажара олмаслиги ҳақида айтиб ўтганди.

Вадим Абрамов футболдан четлатилганини журналистлар орқали билди. У энди ЎФФдан тушунтириш сўрамоқчи

Абрамов эркин фикри учун эмас, иш фаолияти тўлиқ ўрганиб чиқилганидан сўнг футболдан четлаштирилгани айтилди

Синовларни олаётган педагогика фанлари номзоди, профессор Шамиль Исеев бундай имтиҳонлар бутун дунёда борлиги ҳақида айтган. Бироқ айнан қайси мамлакатлар футбол федерациялари клуб футболчиларини шундай имтиҳонларга жалб қилиши масаласини конкрет санаб бермаган. Унинг фикрича, терма жамоаларнинг муваффақиятсиз ўйинларига асл сабаб шунда.

ЖЧ саралашида қатнашган Ўзбекистон миллий терма жамоаси футболчиларининг ўйинларини таҳлил қиладиган бўлсак, учрашув охирларига келиб уларнинг техник-тактик ҳаракатлари пасайгани, тўпни олиб қўйиш, шерикларига ошириш, узун паслар бериш, ҳаводаги тўп учун кураш ва ҳоказоларда браклар кўпайганини кўриш мумкин.

Бизнинг футболчилар жисмоний жиҳатдан кучли бўлмаганликлари туфайли, 90 дақиқа давомида фаол ҳаракат қила олмади. Натижада, ЖЧ йўлланмаси қўлдан бой берилди. Агар миллий чемпионатимизда иштирок этадиган футболчиларнинг жисмоний ҳолати яхши бўлса, бу ҳолат терма жамоаларимиз ўйинларига ҳам ижобий таъсир кўрсатади.

Шамиль Исеев, профессор