Исроил ҳуқуқ-тартибот органлари 13 декабрга ўтар кечаси Иордан дарёсининг Ғарбий соҳилидаги турли туманларда ўтказилган рейдлар давомида 32 фаластинликни, хусусан, ҲАМAS ҳаракати етакчиларидан бири Ҳасан Юсуфни қўлга олди. Бу ҳақда, Исроил армияси матбуот хизмати баёнотига асосланиб, «ТАСС» хабар бермоқда.
Исроил армияси баёнотига кўра, армия, чегара полицияси ва контрразведка кучлари томонидан ўтказилган тунги рейд давомида «террорчилик фаолияти билан шуғулланганлик ҳамда фуқаролар ва аскарларга нисбатан зўравонлик ҳаракатларини содир этганлик гумони остида қидирилаётган 32 фаластинлик қўлга олинган».
АҚШ президенти Дональд Трамп Қуддусни Исроил пойтахти сифатида тан олиш, шунингдек, Америка элчихонасини Тел-Авивдан Қуддусга кўчириш ҳақидаги қарорини эълон қилганидан сўнг, минтақадаги Исроил-Фаластин можароси янада кескинлашди.
Исроил ҳарбийлари ҲАМAS етакчиларидан бири Ҳасан Юсуфни сўнгги йилларда учинчи бор қўлга олмоқда. У муқаддам 2014- ва 2015 йилларда — Исроил-Фаластин можароси айниқса кескинлашган вақтларда қўлга олинган эди.
Қуддуснинг мақоми — Фаластин-Исроил можаросидаги энг марказий масалалардан биридир. Исроилликлар 1967 йилги Олти кунлик уруш давомида шаҳарнинг шарқий қисмини эгаллаган. Исроилликлар Қуддусни Исроилнинг «ягона ва бўлинмас» пойтахти деб ҳисоблайди.
Ўз навбатида, фаластинликлар шаҳарнинг шарқий қисмини ўз давлатининг пойтахти этиб белгилашни истайди.
Изоҳ (0)