Туркия президенти Ражаб Тоййиб Эрдўғоннинг Исроил бўйича нуқтаи назари Кремлга маълум, бироқ Москва бу нуқтаи назарга қўшилмайди. Бу ҳақда Россия президенти матбуот котиби Дмитрий Песков маълум қилди, дея хабар бермоқда «ТАСС».
Аввалроқ Туркия президенти Ражаб Тоййиб Эрдўғон Исроилни террорчилик мамлакати деб атаб, Шарқий Қуддусни Фаластин пойтахти деб эълон қилишни таклиф этган эди.
«Туркия давлати етакчисининг бу нуқтаи назари бизга маълум. Биз бу нуқтаи назарни биламиз ва у айни ҳолатда бизнинг нуқтаи назаримиз билан мувофиқ келмайди. Россиянинг Қуддус ҳамда Яқин Шарқдаги вазиятни тартибга солиш бўйича нуқтаи назари барчага яхши маълум», — деди Песков.Айни вақтда, Путиннинг матбуот котиби Эрдўғоннинг бундай фикрлари Исроил—Фаластин можаросини тартибга солишда қанчалик даражада мақбул эканига баҳо беришдан тийилди. «Мен юқорида билдирган фикрларимга ҳеч нарса қўшимча қилолмайман», — деди у.
Туркия президенти Ражаб Тоййиб Эрдўғон 13 декабрь, чоршанба куни Ислом ҳамкорлик ташкилотининг Истанбулда очилган фавқулодда саммитидаги кириш нутқида Исроилни «босқинчи ва террорчи» давлат деб атаган эди.
Эслатиб ўтамиз, 6 декабрь куни АҚШ президенти Дональд Трамп Қуддусни Исроил пойтахти сифатида тан олган, шунингдек, давлат департаментига АҚШ элчихонасини Тел-Авивдан Қуддусга кўчириш ҳақида кўрсатма берган эди.
Изоҳ (0)