«Исроил — террорчи давлат!». Эрдўғон Қуддусни Фаластин пойтахтига айлантиришни таклиф қилди

Қуддус Фаластин пойтахти бўлмоғи лозим. Туркия президенти Ражаб Тоййиб Эрдўғон Ислом ҳамкорлик ташкилотининг Истанбулдаги фавқулодда саммитида худди шундай таклиф билан чиқиш қилди, дея хабар бермоқда Reuters.

Туркия етакчисининг сўзларига кўра, Исроил томонидан амалга оширилаётган «террорчилик ҳаракатлари» жаҳон мамлакатларини мана шундай қарор қабул қилишга ундаши керак.

АҚШ, халқаро нормаларни поймол қилгани ҳолда, Қуддусни Исроил пойтахти сифатида тан олди. Шаҳар оккупация остида экани англаб етиш учун унда бир неча қадам ташлаш кифоя.

Исроил — бу террорчилик мамлакати. Террорчи-ҳарбийлар болаларни тутиб, уларни қамоққа ташламоқда. Қуддусни босиб олинган Фаластин давлатининг пойтахти деб тан олишга чақираман.

Ражаб Тоййиб Эрдўғон, Туркия президенти

Трампнинг бу қарори жаҳоннинг кўплаб етакчилари томонидан қораланди. 7 декабрь куни Ғазо секторида назорат ўрнатган ҲАМАС ҳаракати Исроилга қарши янги исён бошлашга чақирди.

Расмий Анқара Трамп ўз қарорини эълон қилиши арафасида, агар Қуддус исроилликлар пойтахти сифатида тан олинадиган бўлса, Исроил билан алоқаларини узишга ваъда берган эди.

Исроил 1949 йили, мустақиллик учун уруш якунига етганидан сўнг, Қуддусни ўз пойтахти деб эълон қилган. 1967 йили, Олти кунлик урушдан сўнг, Исроил қўшинлари Шарқий Қуддусни эгаллаб, уни Ғарбийси билан бирлаштирган, бироқ БМТ буни тан олмаган.

Исроил билан дипломатик алоқалари мавжуд мамлакатлар ўз элчихоналарини асосан Қуддус, Рамат-Ган ва Ҳерцлияга жойлаштиради.