Apple Калифорниядаги ўрмон ёнғинлари оқибатларини бартараф этишга 1 млн доллар хайрия қилди

Apple Калифорния штатида ўрмон ёнғинлари оқибатларини бартараф этишга кўмак бериш учун 1 миллион доллар хайрия қилди. Бу ҳақда Forum Daily хабар бермоқда. 

Офатдан жабрланганлар орасида компания ходимлари ҳам бор: Apple штаб-квартираси Калифорниянинг Купертино шаҳрида жойлашган. 

«Биз Калифорния жанубидаги ёнғиндан азият чеккан барча, жумладан, ҳамкасбларимиз, дўстларимиз ва уларнинг оилалари билан биргамиз. Apple офат зарар етказган ҳамжамиятларни тиклашга қаратилган ҳаракатларга кўмак учун 1 миллион доллар хайрия қилади», — дейилади компания баёнотида. 

Шунингдек, компания App Store, iTunes Movies, iTunes ТV, Apple Music, Apple Podcаsts ва iBooks каби ресурслари фойдаланувчиларига ёнғинлардан жабрланганлар учун маблағ хайрия қилиш имкониятини яратди. 

Эслатиб ўтамиз, олдинроқ Калифорниядаги ўрмон ёнғинлари туфайли 200 минг киши эвакуация қилингани ҳақида хабар берилганди.