Олий Лига—2017. Равшан Эрматов энг қаттиққўл ҳам, энг сермаҳсул ҳам бўла олмади. У энг намунали

Футбол бўйича Ўзбекистон Олий Лигасининг 2017 йилги мавсуми бир қатор рефериларнинг четлатилиши билан ёдда қолди. Биринчилардан бўлиб, Рустам Бобомуродов футбол билан умрбод хайрлашишига тўғри келди.

Ҳозир бу ҳақда эмас. «Championat.asia» нашри 2017 йилги мавсум учун ҳакамлар статистикасини тақдим этди. Бу йил уларга бўлган эътироз янада кўпайиб кетгани инобатга олинса, статистика Ўзбекистон футболи мухлислари учун қизиқ бўлиши мумкин.

Энг намунали ҳакам

Сизнингча, Ўзбекистонда Равшан Эрматовдан яхшироқ ҳакам бўлиши мумкинми? Саволни балки бошқача қўйса бўлар: назоратчилар Равшан Эрматовдан бошқа яна кимни яхшироқ баҳо билан сийлаши мумкин?

Олий Лиганинг 22 та ўйинида ишлаган Эрматовга ўртача 9,05 балл қўйилди. Бу энг юқори кўрсаткичдир. Владислав Цейтлин ва Валентин Коваленкода мазкур кўрсаткич ўртача 8,86 ни ташкил қилди.

Энг сермаҳсул ҳакам

Халқаро ўйинларга кўпроқ жўнаб кетгани учун бўлса керак, ҳар ҳолда Эрматов энг кўп ўйинда ишламади. Бу борада унинг кўрсаткичи Владислав Цейтлинникидан 1 тага қолиб кетди. Сейтлин 23 та беллашувда 81 марта сариқ карточкасига мурожаат қилди, 3 марта футболчиларга чиқиш эшикларини кўрсатиб қўйди ва 3 марта 11 метрлик нуқтани кўрсатди. Кўринадики, у ўрта ҳисобда ҳар бир ўйинда 3,5 та футболчини огоҳлантирган.

Энг қаттиққўл ҳакам

Бу — Эрматов эмас! Ваҳолкнки, 22 та ўйинда рефери 100 нафар футболчини огоҳлантирди ва 3 нафарини майдондан четлаштирди. Равшан Эрматов ҳар бир учрашувда ўртача 4,5 футболчига сариқ карточка кўрсатиб чиққан. 6 марта 11 метрлик нуқтани кўрсатган.

Шунда ҳам энг қаттиққўли бу Бахтиёр Намозовдир. У ўртача ҳар ўйинда 5 та сариқ кўрсатган. Ўзи бор-йўғи 7 та ўйинда ишлаган бўлса-да, мана шундай ном тарата олган. Яна 5 марта қизилга юзлангани эътиборга молик.

Энг юмшоқ ҳакам

«Шўртан» — «Навбаҳор» ўйинидан кейин 10 та футбол учрашувига дисквалификация қилинган Олим Толибжонов футболчиларга ўртача ҳар бир ўйинда 2,27 тадан сариқ кўрсатган. Ва фақатгина 1 марта қизилга мурожаат этган. Бу борада Толибжонов ўзининг юмшоқлиги билан ажралиб турган. Балки унга кескинлик кўпроқ бўлган ўйин берилмагандир, яна ким билади...

Пенальти

Виктор Серазетдинов, Исхоқ Ибрагимов, Аҳмад Эргашев, Рустам Бобомуродов, Акмал Раҳимов каби ҳакамлар умуман қизил карточкага мурожаат этмаган бир вақтда, Димитрий Пислегин ўзи иштирок этган ҳамма ўйинда пенальти қўйиб чиққан, аниқроғи, статистика шунга тўғри келади. Исхоқ Ибрагимов, Рустам Бобомуродов, Акмал Раҳимов кабилар қизилдан ташқари, пенальти ҳам беришмаган.