Ҳиндистоннинг Деҳли шаҳрида ўз чақалоғини ўлик деб ҳисоблаган ота-она куйдириш маросимидан олдин унинг тирик эканлигини пайқаб қолди. Бу ҳақда «РИА Новости» хабар берди.
Max Hospital тиббий маркази ходимлари янги туғилган эгизакларнинг қариндошларига улардан бири ўлик туғилганини, иккинчисини эса сунъий нафас олдириш аппаратига улаш кераклигини айтган. Шифокорлар оиладан клиникадаги биринчи уч кунлик даволаш учун 1,5 минг доллар талаб қилган. Кейинги ҳар бир кун эса 775 долларга тушиши мумкин бўлган. Бунда чақалоқ шифохонада яна уч ой ётиши керак бўлган.
Ота-она бундай харажатни тўлай олмагани сабабли, улар болани бошқа клиникага олиб ўтишга қарор қилган. Шундан сўнг шифокорлар ота-онага чақалоқ ўлик эканлигини маълум қилган ва қариндошларга эгизакларнинг жасадлари солинган иккита полиэтилен пакетни берган.
Олти соатдан сўнг, жасадларни куйдириш маросимидан олдин ота-она пакетлардан бири қимирлаганини пайқаб қолган.
Улар дарҳол пакетни йиртган ва чақалоқнинг нафас олаётганини кўрган. Шу заҳотиёқ чақалоқ энг яқин шифохонага олиб борилган. Айни вақтда чақалоқнинг аҳволи барқарор деб баҳоланмоқда.
Ҳиндистон соғлиқни сақлаш вазири Жагат Пракаш Надда ҳодисага ўз муносабатини билдириб, Деҳли раҳбариятига уни ўрганиб, тегишли чоралар кўришга топшириқ берган. Маҳаллий ҳуқуқни муҳофаза қилиш органлари аллақчон текширувни бошлаган.
Max Hospital клиникаси томонидан боланинг жасади қариндошларига ҳеч қандай ҳаёт белгиларисиз топширилгани маълум қилинган. Хатолик учун жавобгар шифокор эса айни вақтда таътилда. Клиника шифокорлари бепарволикда айбланмоқда.
Изоҳ (0)