Зимбабве суди ҳарбийларнинг Мугабени ҳокимиятдан четлатиш бўйича ҳаракатлари қонуний бўлгани ҳақида ҳукм чиқарди

Зимбабве Олий суди мамлакат ҳарбийларининг собиқ президент Роберт Мугабени истеъфога чиқариш бўйича ҳаракатлари қонуний экани ҳақида қарор чиқарди. Бу ҳақда «РБК» хабар бермоқда.

Олий суд раиси Жорж Чивешнинг тасдиқлашича, ҳарбийлар «Роберт Мугабенинг конституциявий ваколатлари унинг атрофидагилар томонидан эгаллаб олинишини тўхтатиш мақсадида» қилган ҳаракталари қонуний ва Конституция буни маъқуллайди. Бундан ташқари, суд қарорига кўра, Роберт Мугабе томонидан вице-президент Эммерсон Мнангагванинг истеъфога чиқарилиши ноқонуний ҳаракат бўлган.

75 ёшли Мнангагва 24 ноябрь куни расман қасамёд қилди ва Зимбабве президенти вазифасини бажаришга киришди. Зимбабве ҳарбийлари 15 ноябрь куни пойтахт устидан назорат ўрнатиб, Мугабени уй қамоғига жойлаштирган эди. Унга нисбатан Конституция талабларини бузиш ва мамлакат иқтисодиётини тушкунликка тушириш айбловлари эълон қилинди.

Бундан ташқари, ҳукмрон ZANU-PF («Зимбабвенинг Африка миллий иттифоқи — Ватанпарварлик фронти») партияси Мугабега ултиматум қўйди: президент 20 ноябрга қадар ўз ваколатларини топшириши, акс ҳолда, парламент унинг ҳокимиятдан четлатилиши учун овоз бериши керак эди. Мугабе 21 ноябрь куни ўз хоҳишига кўра истеъфо беришга қарор қилди. У 37 йилдан бери Зимбабвега раҳбарлик қилиб келаётган эди.